Assalomu alaykum! “Gulxan” jurnali saytiga xush kelibsiz!

Saytimizda bir-biridan qiziqarli maqolalar, hikoyalar, ertaklar va she’rlarni o‘qishingiz mumkin. Turli fanlarga oid ma’lumotlar bilimlaringizni yanada boyitishga yordam beradi!

Bahromning hikoyasi

Elimizning ardoqli ijodkori, Oʻzbekiston xalq shoiri Anvar Obidjon olamdan oʻtdi. Ijodining katta qismini bolalar adabiyotining rivojiga bagʻishlagan shoirning oʻnlab sheʼr va hikoyalari siz oʻquvchilarga yaxshi tanish. Anvar aka “Gulxan” bilan hamisha birga boʻldilar. Eng yangi asarlarini jurnal oʻquvchilariga taqdim etdilar. “Gulxan”ning muxlislari xuddi avvalgidek yuz minglab boʻlishini istadilar. Qaysi davra yoki uchrashuvda boʻlsalar ham bolalar nashrlari haqida iliq fikrlar bildirib, ularni targʻib qilishdan charchamadilar. Anvar Obidjon sheʼrlari hali yana oʻnlab avlodni tarbiyalashiga ishonamiz. Chunki Anvar aka bolalar dunyosini, ular qalbini juda tushunar, dunyoni bola nigohi bilan kuzata bilar edilar. Ustozning yorqin xotirasi qalbimizda saqlanadi.

Quyida suyukli shoirimizning yengil yumorga yoʻgʻrilgan sheʼriy hikoyasini sizlarga taqdim etmoqdamiz.

 

Bahromning hikoyasi

 

Zoʻr tovugʻim bor edi,

Semiz va sergap.

“Yapaloq” deb men unga

Qoʻygandim laqab.

 

Tuxum tugʻib berardi

Har kuni oppoq,

Shu tufayli u bilan

Yashardik inoq.

 

Ammo soʻnggi paytda u

Boʻpqoldi ayyor.

Tuxum desang, yuz burar,

Don sochsang – tayyor.

 

“Dangasa!” deb kecha sal

Qilgan edim doʻq,

Bugun koʻrsam katakda –

Tovuqqinam yoʻq.

 

“Yapaloq”ni qidirdim,

Chaqirdim rosa.

Nahotki u arazlab

Ketvorgan boʻlsa?

 

Katagida qolibdi

Faqat bitta pat

Va oydinda yozilgan

Aji-buji xat:

 

“Menga juda mehribon,

Shirinsoʻz eding.

Doim suyib, erkalab,

Tuxumim yerding.

 

Seni doʻst deb yurardim,

Tushundim bugun –

Faqat oshno ekansan

Quymoqlar uchun.

 

Tuxumni ham berardim,

Kutmading picha.

Qoʻpol soʻylab ayniqsa,

Ranjitding kecha.

 

Garchi sendan ayrilmoq

Boʻlsa ham ogʻir,

Qaror qildim bosh olib

Ketmoqqa oxir.

 

Chunki doʻst deb yurgani

Taʼmagir chiqsa,

Hatto oddiy tovuq ham

Oʻksinarkan ja...

 

Endi boshqa joylarda

Solaman dovrugʻ.

Seni eslab yurguchi:

“Yapaloq” tovuq.

 

...Mendan bitta iltimos,

Bolalar sizga.

“Yapaloq”ni koʻrsangiz,

Qaytaring tezda.

 

Qaytsa chin doʻst boʻlardim,

Soʻzlardim sizlab.

Kechirim ham soʻrardim

Patlarin silab.

Anvar Obidjon

2016–2020 © “Gulxan” jurnali tahririyati. Barcha huquqlar himoyalangan. Saytdan ma’lumot olinganda manba ko‘rsatilishi shart.