Assalomu alaykum! “Gulxan” jurnali saytiga xush kelibsiz!

Saytimizda bir-biridan qiziqarli maqolalar, hikoyalar, ertaklar va she’rlarni o‘qishingiz mumkin. Turli fanlarga oid ma’lumotlar bilimlaringizni yanada boyitishga yordam beradi!

Butun dunyo kulib tursin

Odil ABDURAHMON

 

Non qo‘shig‘i

 

Bug‘doy nonim, shirmoy nonim,

Shirinliging mening jonim.

Ushog‘ingni ko‘zga surtib,

Dadamlardan rahmat oldim.

Dehqon bobom himmatisan,

Taomlarning qimmatisan.

Dasturxonning eng to‘rida

Donolarning hurmatisan.

Yuzda quvonch qo‘nib tursin,

Butun dunyo kulib tursin.

Bug‘doy nonga, shirmoy nonga

Tandirimiz to‘lib tursin.

 

 

Muallimim, ustozim

 

Yuragimga yaqin bo‘lgan,

Gap-so‘zlari chaqin bo‘lgan,

Olimga ham aql bo‘lgan,

Muallimim, ustozim.

Sirlar bilan sirlashgan,

Olam bilan tillashgan,

Minglab dilga birlashgan,

Muallimim, ustozim.

Sizdan olib andoza,

Aqlim ham tiniq, toza,

Tolmayman she’rlar yoza,

Muallimim, ustozim.

2016–2017 © “Gulxan” jurnali tahririyati. Barcha huquqlar himoyalangan. Saytdan ma’lumot olinganda manba ko‘rsatilishi shart.