Assalomu alaykum! “Gulxan” jurnali saytiga xush kelibsiz!

Saytimizda bir-biridan qiziqarli maqolalar, hikoyalar, ertaklar va she’rlarni o‘qishingiz mumkin. Turli fanlarga oid ma’lumotlar bilimlaringizni yanada boyitishga yordam beradi!

“Gapirganda oʻyla har dam”

Xalqimizning suyukli shoiri Tolib Yoldosh tavalludining 100 yilligiga

 

Bilasizmi, bolalar?

Zoʻravon kim, qoʻrqoq kim,

Bilasizmi, bolalar?

Bularning har ikkisi –

Qoʻrqoq, koʻzi olalar.

Zoʻravonlik nomiga,

Asli qoʻrqoq oʻzlari

Sagʻal gapga jiringlab,

Ola-kula koʻzlari.

“Kel, qoʻy”, desang qaramay,

Yoqangizdan tutadi.

Bunday maqtanchoqlardan

Kim polvonlik kutadi?

Polvon boshqa, bilsangiz,

U ogʻir, yuvvosh boʻlar.

Bir kuchin koʻrsatsami,

Qirq bolaga bosh boʻlar.

Yoʻq, yoʻq, u juda kamtar,

“Man-man”likni xushlamas.

Oʻrtoqlarin hurmatlar,

Yoqasidan ushlamas.

 

 

Maqtanchoqqa

Sen oʻzingni oʻzing koʻkka

Koʻtarma koʻp.

Toʻgʻri, oʻzing, juda yaxshi –

Bolasan, xoʻp.

Lekin seni boshqa birov

Maqtar boʻlsin,

Soʻzlaringga keksa-yu yosh

Mahtal boʻlsin.

Hayotda bir oʻzing emas,

Qaraysanmi?

Hamma sevib maqtashlikka

Yaraysanmi?

 

Gapning joni

Qiziq, gapning joni bormi,

Gap ham tirik jonivormi?

Koʻrmaganman nega men hech,

Soʻzlashsam-da erta-yu kech.

– Toʻgʻri, uni koʻrish qiyin,

Koʻrarsan ham bir oz keyin.

Omon uzoq oʻylab qolar,

Xayol bilan oʻynab qolar...

Ota oʻgʻlin anglab shunda: –

Hech qanday sir yoʻq, – der bunda.

– Zar qadrini bil avvalam,

Gapirganda oʻyla har dam.

Sayrayverma apil-tapil,

Avval oʻylab, keyin gapir.

Gapning yaxshi, yomoni bor,

Kamida ming tomoni bor.

Tishi ham bor, nishi ham bor,

Yozi ham bor, qishi ham bor,

Guli ham bor, tikani ham,

Uning jonli ekani ham

Ana shunda, – der otasi –

Toʻgʻri soʻzning yoʻq xatosi.

 

Oftob – ona

Koʻpni koʻrgan keksalar

Oftob – ona deydilar.

Oftob soʻzi shunchaki

Bir bahona deydilar.

Necha yillar shu oftob

Yoritgan keng olamni.

Necha yoshga kirgan u

Aqli yetmas odamning.

Bu toʻgʻri gap – hayotda

Oftob katta onamiz.

Bolalikdan biz mehr

Nurlariga qonamiz.

Ulgʻayamiz, ham uning

Bagʻridamiz erta-kech,

Ona mehri – oftobdan

Ayrilmasak, deymiz hech.

 

Tolib Yoʻldosh

2016–2017 © “Gulxan” jurnali tahririyati. Barcha huquqlar himoyalangan. Saytdan ma’lumot olinganda manba ko‘rsatilishi shart.