Assalomu alaykum! “Gulxan” jurnali saytiga xush kelibsiz!

Saytimizda bir-biridan qiziqarli maqolalar, hikoyalar, ertaklar va she’rlarni o‘qishingiz mumkin. Turli fanlarga oid ma’lumotlar bilimlaringizni yanada boyitishga yordam beradi!

“Hozircha otim cho‘pdan...”

Multik

 

Ukam ko‘rar multikni

Berilgancha juda ham.

Ekranga lol tikilgan

Chalg‘itib bo‘lmas hecham.

 

– Uxla, – deya o‘rniga

Yotqizaman chiranib.

Ko‘zlarini yumadi

Ko‘rpasiga o‘ranib.

 

Der: – Uxlolmam akajon,

So‘z bersam ham o‘zimga.

Axir joylashib olgan

Multfilmlar ko‘zimga.

 

 

Baliq

 

Qarmoq tashladim suvga,

Bitta baliq ilindi.

Og‘zini katta ochib:

– Qo‘yvorgin, – deb yalindi.

Baliqqa qo‘ydim bir shart:

– Maktabimga bor, – dedim.

– Jurnaldan “ikki”larni

Bitta-bitta ol, – dedim.

Tipirlagan baliqning

Dumi tegdi boshimga.

– Turgin, – deb turtar oyim,

Xalal berib tushimga.

 

 

Chavandoz

 

Uchqur otim poygada

O‘zib ketar,

Tuproqqa uzun chiziq

Chizib ketar.

Ha chuv, chop, deb do‘stlarim

Quvib yetmas,

Birontasi tezlikda

Bizdan o‘tmas.

Charchab, terlab ayg‘irda

Turaman g‘oz,

Hozircha otim cho‘pdan,

Men chavandoz.

 

O‘tkirjon TOTLIBOYEV,

Jizzax shahri

2016–2017 © “Gulxan” jurnali tahririyati. Barcha huquqlar himoyalangan. Saytdan ma’lumot olinganda manba ko‘rsatilishi shart.