Assalomu alaykum! “Gulxan” jurnali saytiga xush kelibsiz!

Saytimizda bir-biridan qiziqarli maqolalar, hikoyalar, ertaklar va she’rlarni o‘qishingiz mumkin. Turli fanlarga oid ma’lumotlar bilimlaringizni yanada boyitishga yordam beradi!

Jajji she’rlar

– Til o‘rganishning eng yaxshi yo‘li so‘zlar mazmuni yashiringan she’rlarni o‘qish. Bola so‘z qadrini tushunsagina chinakam kitobxon bo‘ladi. Iqbol Mirzoning “Erkatoy – erka toy” kitobini o‘qib juda quvondim. Chunki Iqboljon tuyuqlarimizga hamohang so‘z o‘yinlari tufayli bolalarga so‘z jozibalarini, so‘zning bag‘riga yashirilgan mo‘jizani ko‘rsata olgan, – dedi O‘zbekiston xalq yozuvchisi Xudoyberdi To‘xtaboyev Respublika bolalar kutubxonasida o‘tkazilgan ushbu kitob taqdimotida. O‘zbekiston xalq shoiri Iqbol Mirzoning ustozning yuksak bahosiga sazovor bo‘lgan, “Erkatoy – erka toy” kitobi “Sano-standart” nashriyotida chop etilgan. Kitob sizlarga ham manzur bo‘lib, doimiy hamrohingizga aylanishiga ishonamiz. Zero, muallif ushbu kitobni unga ilhom bergan qizalog‘i Kumushoy va barcha adabiyotni yaxshi ko‘radigan bolajonlarga bag‘ishlaydi.

 

Tulkining ukasiga dashnomi

Qanaqa betartibsiz?!

Dumimga bet artibsiz!

 

Akang qarag‘ay

Men archaga og‘aman,

U tarafga og‘aman.

 

Shaharlik kaptar suvombor haqida

Ko‘rdim ikki tog‘ ora,

Suv lim to‘la tog‘ora.

 

Xirmonda hozir kalamushga sichqonning e’tirozi

Bu – tekinxo‘r “donolar”

Ekin ekmay don olar.

 

O‘rgimchak topgan rohat

Chiqib uyning to‘riga,

Yonboshladi to‘riga.

 

Yo‘rg‘aning bola tarbiyasi

Bo‘rini tep, tishlab ot!

Toychog‘im, sen otsan, ot!

 

Chuvalchangning hayrati

Ota-onam tinmay yer,

Tugab qolmasmikan Yer?

 

Turna

Davraga eldan burun

Suqulib kirdi burun.

2016–2017 © “Gulxan” jurnali tahririyati. Barcha huquqlar himoyalangan. Saytdan ma’lumot olinganda manba ko‘rsatilishi shart.