Assalomu alaykum! “Gulxan” jurnali saytiga xush kelibsiz!

Saytimizda bir-biridan qiziqarli maqolalar, hikoyalar, ertaklar va she’rlarni o‘qishingiz mumkin. Turli fanlarga oid ma’lumotlar bilimlaringizni yanada boyitishga yordam beradi!

Kitob – sodiq do‘st erur

Kitobni seving

Butun borliq tabiat

Sevgan kabi oftobni,

Bolajonlar, sizlar ham

Seving aziz kitobni.

 

Kitob – sodiq do‘st erur,

Xoh kunduz, xoh tundadir.

Bor sir-u asrorlarning

Yechimi ham undadir.

 

Kitob bois qalbingiz

Oy-yulduzdek porlagay.

U sizni ezguliklar

Dunyosiga chorlagay.

 

Yaxshi ertak, hikoya,

Go‘zal she’r-u dostonlar.

Ko‘nglingizni yayratar

Etib bog‘-u bo‘stonlar.

 

Kimki kitob o‘qish-la

O‘tkazadi vaqtini.

Hayotda u albatta,

Topgaydir o‘z baxtini.

 

Kitob do‘st erur mudom

Butun insoniyatga.

Uni sevib sizlar ham

Yeting orzu-niyatga!

 

 

Tulki

Tulkini ko‘p quv, ayyor,

Jonivor, deb atashar.

Uni tutmoq bo‘lganlar

Yo‘lidan ko‘p adashar.

 

Epchil-u hushyorlikda

U ko‘pni lol qoldirgan.

Hatto bo‘ri ham unga

Og‘zidagin oldirgan.

 

Xavf-xatardan holidir

Tulkivoyning uyasi.

Chunki, yaxshi ishlaydi

Bu makkorning miyasi.

 

Agar qay bir tulkining

O‘tmay qolsa hiylasi.

Ovchining ayoliga

Po‘stin bo‘lar xullasi.

 

Zikrilla Ne’mat

2016–2017 © “Gulxan” jurnali tahririyati. Barcha huquqlar himoyalangan. Saytdan ma’lumot olinganda manba ko‘rsatilishi shart.