Assalomu alaykum! “Gulxan” jurnali saytiga xush kelibsiz!

Saytimizda bir-biridan qiziqarli maqolalar, hikoyalar, ertaklar va she’rlarni o‘qishingiz mumkin. Turli fanlarga oid ma’lumotlar bilimlaringizni yanada boyitishga yordam beradi!

“Oh, naqadar go‘zalsan...”

Favvora

Favvora, hoy favvora,

Orzusiga yetgan suv.

Kelib katta shaharga,

Ko‘kka parvoz etgan suv.

 

Zarrin quyosh nurida

Kamalakdek tovlanding.

Hammaning ko‘z o‘ngida

Tovus kabi sollanding.

 

Tenglasholmas toshqin soy

Shijoatda, g‘ayratda.

Shu sababmi, hoynahoy,

Qarashadi hayratda.

 

Oh, naqadar go‘zalsan,

Hamma shoshar ko‘makka.

Otilaver, to‘xtasang,

Aylanasan ko‘lmakka.

 

 

Mazza qildik

Ukam bilan to‘yib-to‘yib,

Kalla tashlab suzishdik.

G‘avvoslardek quloch yoyib,

Dumalashib o‘zishdik.

 

Hayron qolmang, bilmasding deb,

Na sho‘ng‘ish, na suzishni.

Aka-uka xo‘p mashq qilib,

Qoyillatdik bu ishni.

 

Yangi uyga ko‘chgan kuni

Uyib tashlab o‘rtada,

Ukam bilan rosa to‘yib,

Cho‘milishdik... ko‘rpada.

 

Tog‘da

Qoyadagi lolani

Ololmadik tirishib.

Go‘zallikka kuch bilan

Bo‘lmas ekan erishib.

 

Tirnaldi qo‘l-oyog‘im,

Azobini chekaman.

Ahd qildim: bahor chog‘i

O‘zim lola ekaman.

 

Mix

Qiyshaysa mix –

Mug‘ombir,

Ishga tushadi

Ombir.

 

Mix egilib,

Sug‘urilar.

Bolg‘a urib

To‘g‘irlar.

 

Tep-tekis qilar

Sixday.

Mix yana bo‘lar

Mixday.

 

Zag‘izg‘onning shikoyati

Odamlarning odati

O‘xshar qiziq jumboqqa:

Yaqin yo‘latishmaydi

O‘zim ekkan yong‘oqqa.

 

Xudoyberdi Komilov

2016–2017 © “Gulxan” jurnali tahririyati. Barcha huquqlar himoyalangan. Saytdan ma’lumot olinganda manba ko‘rsatilishi shart.