Assalomu alaykum! “Gulxan” jurnali saytiga xush kelibsiz!

Saytimizda bir-biridan qiziqarli maqolalar, hikoyalar, ertaklar va she’rlarni o‘qishingiz mumkin. Turli fanlarga oid ma’lumotlar bilimlaringizni yanada boyitishga yordam beradi!

Qo‘shiqlar yangrasa baralla

“Do‘stlik” ordeni sohibi Haydar Muhammad nomi xalqimizga tanish. Kattalar u kishining qator dramalari yoki hofizlar ijrosidagi o‘nlab mashhur qo‘shiqlarini, bolalar esa “Baxti erkatoy”, “Taka-taka shumtaka”, “Toychog‘im” singari yuzdan ortiq bolalar qo‘shiqlari orqali biladilar. Ularni maktabdagi bayramlarda mazza qilib ijro etadilar. Ha, iste’dodli ijodkor Haydar Muhammad nafaqat kattalarni, bolalarni ham juda yaxshi ko‘radilar. Shu bois bolalarga yoqadigan ko‘plab she’rlari qo‘shiqlarga aylangan. Aprel oyida Haydar bobo 80 yoshga to‘ldilar. Biz shoirimizni qutlug‘ yosh bilan tabriklar ekanmiz, ulardan yana ko‘p-ko‘p quvnoq she’r va qo‘shiqlar kutib qolamiz.

 

Hashar

 

Hamma ishchan, serg‘ayrat,

Har kim ish bilan mashg‘ul.

Xo‘p ajoyib harakat,

Rohatlanar dil-ko‘ngil.

 

Sulton, Tohir, Mirqodir,

Devor, daraxtni oqlar.

Lekin Xolvoy mug‘ombir,

Darrov o‘zini oqlar.

 

Qilgan ishin so‘rang bir,

Gap topadi ishqilib:

– Daraxtni ushlab turdim,

Ketmasin deb, yiqilib.

 

Faollar quloq soling,

Izza bo‘lsin tanbal Xol,

“Shiq”qa suratin oling,

“Chaqmoq”qa bering darhol.

 

Derlar, o‘zbekcha hashar,

Hashardan vatan yashnar.

 

 

Bu yurtning yoshlari

 

Daryolar top-toza oqsalar,

Oqshomda ming chiroq yoqsalar.

Odamlar kulishib boqsalar,

Bilingki bu yurtning yoshlari

Mehribon, sog‘-omon.

 

Tinch-omon bo‘lsa gar mahalla,

Qo‘shiqlar yangrasa baralla.

Taralsa yor-yorlar va alla,

Biling-ki, bu yurtning yoshlari

Posbon, qahramon.

 

Keksalar izzatli bo‘lsalar,

Onalar shodlikka to‘lsalar.

Gulzorlar yayrashib kulsalar,

Biling-ki, bu yurtning yoshlari

Bilimdon, g‘azalxon.

 

Elatlar do‘stlikni kuylasa,

Elchilar ellarni ulasa.

Odamlar bir-birin siylasa,

Biling-ki, bu yurtning yoshlari

Bilimdon, mard o‘g‘lon.

 

Haydar MUHAMMAD

2016–2017 © “Gulxan” jurnali tahririyati. Barcha huquqlar himoyalangan. Saytdan ma’lumot olinganda manba ko‘rsatilishi shart.