Karimaxon Ashurova rahbarlik qilib kelayotgan “Hazrat Haziniy” to‘garagini nafaqat Bag‘dodda, balki butun Farg‘ona viloyatida yaxshi bilishadi.

100 dan ortiq iqtidorli yoshlarni ijod qozonida qaynatib, qalamini charxlayotgan iste’dod maktabi mana 18 yildirki faoliyat yuritib kelmoqda. To‘garak bog‘ida “hosil bergan” she’rlardan eng saralarini sahifamizda e’lon qilyapmiz.

Do‘ppi

O‘zbeklarning faxrisan,

Turli xillaring bor-a.

Yuz yillar o‘tsa hamki

Urfdan qolmaysan sira.

Xizmating ko‘pdir menga,

Avaylab seni o‘pdim.

Soyabon ham kerakmas,

Boshimda bo‘lsang, do‘ppim.

Abdumalik XURSANALIYEV,

1-maktab 6-sinf

Chumchuq

Chidar jazirama yozning kuniga,

Qishning qahratonin ko‘zga ilmaydi.

Umrining boricha bir joyda yashar,

Ba’zi nomardlarning ishin qilmaydi.

Na qarg‘aga o‘xshar, na qaldirg‘ochga,

U tanho qush erur, asl dovyurak.

Vatanga qandayin sodiq bo‘lmoqni

Aslida chumchuqdan o‘rganmoq kerak.

Jasurbek NABIYEV,

43-maktab 8-sinf

Buzoqcha

Sho‘xligi tutib

Qorni to‘q buzoq.

Qo‘radan chiqib

Yugurdi uzoq.

Ortidan quvlab

Shamoldek yeldim.

Somonxonadan

Yetaklab keldim.

Endi to‘polon

Qilmaydi shayton.

Chunki bo‘ynida

Bir quloch arqon.

Ra’noxon NO‘MONJONOVA,

22-maktab 6-sinf

Qalbdagi oftob

Seni o‘qib xayolimga

Kelar yangi g‘oyalar.

Ezgulikka chorlaydi

Ertag-u hikoyalar.

Oftobga o‘xshataman,

Doim seni, kitobim.

Shuning uchun deyman-da:

“Qalbimdagi oftobim”.

Saidbek ABDURASHIDOV,

14-maktab 6-sinf

Yashamoqning o‘zi baxt

Yashnab turgan chamanda,

Shunday go‘zal maskanda,

Ozod va hur Vatanda,

Yashamoqning o‘zi baxt.

Mehr jo‘shadi qonda,

Uni saqlayman jonda.

Shunday aziz makonda

Yashamoqning o‘zi baxt.

Otabek AKBAROV,

16-maktab bitiruvchisi