Vatanga talpinib urmoqda yurak
Toshkent viloyati Bekobod tumanidagi “Ilhom” ijodkorlar klubi 2005-yilda tashkil topgan. Unga iste’dodli pedagog shoir Nurali Jalil rahbarlik qiladi. Yuragida adabiyotga mehr, ijodga ishtiyoq bo‘lgan o‘nlab yoshlarni biriktirgan ushbu klub shu kungacha 500 ga yaqin havaskorlarga she’riyatdan saboq berdi. Ularning iqtidorini yuzaga chiqarishda ko‘makdosh bo‘ldi. Bugun ana shu klubning kenja vakillari ijodidan namunalar bilan tanishasiz.
Sog‘inchim
Salom tuyg‘ularim,
Salom hislarim.
Men sizni sog‘indim,
Sizni izladim.
Men sizni qidirdim,
Chaman bog‘lardan.
Lolalar yastangan
Adir, tog‘lardan.
Tunlari ko‘zimdan
Qochadi uyqu.
Salom senga ilhom,
Ey, go‘zal tuyg‘u.
Muattar MAMAJONOVA,
1-maktab 9-sinf o‘quvchisi
Shukrona
Vatanga talpinib urmoqda yurak,
Kuch-quvvat baxsh etar ajdodlarimiz.
Har sohada bizga bo‘ladi qanot –
Bilim, matonat va sabotlarimiz.
Baxtli davronlarni berganga shukur,
Bu so‘zlarni har kun aytaman takror.
Ey, aziz vatandosh, qo‘lni qo‘lga ber,
Har bir kunimizga shukrona darkor.
E’zozaxon XOLMIRZAYEVA,
21-maktab 7-sinf o‘quvchisi
Yoshlik
Yoshdan-yoshga o‘taman,
Yildan-yilga ulg‘ayib,
Ostonada gulbahor,
Kutib olar jilmayib.
Meni maftun qiladi,
Yoshlikning har bir yili.
Ochilib tursin doim,
Umrimning umid guli.
Marjona TOJIQULOVA,
45-maktab 9-sinf o‘quvchisi
Yurtim shamoli
Sen quvib bulutlarni
To‘zon bo‘lib kelasan.
Bepoyon kengliklarda
Qaydan qayga yelasan?
Majnuntolning sochlarin
Siypalab o‘tasan sen.
Ko‘chalarni changitib
To‘zg‘itib ketasan sen.
Dala-yu qir, bog‘larning
Sen ochasan jamolin.
Tinim bilma, esaver
Hur o‘lkamning shamoli.
Manzura MIRZAHOSHIMOVA,
28-maktab 7-sinf o‘quvchisi
O‘zbekiston
Parvozingda bizlar sening qanotingmiz,
Sinovlarda bardoshingmiz, sabotingmiz,
Biz buguning, biz ertangmiz, hayotingmiz,
Jannatning bir bo‘lagisan, O‘zbekiston
Yayrab yurdik, baxtli yurdik qo‘rg‘oningda,
Nihol kabi yaproq yozdik gul-bog‘ingda.
Sen bizlarni asragaysan qarog‘ingda,
Dilimiz pok tilagisan, O‘zbekiston.
Sarvinoz IKROM,
41-maktab 9-sinf o‘quvchisi
