An’anaga aylanganidek, bu yili ham buyuk mutafakkir bobomiz Alisher Navoiyning tavallud kuni butun respublikamiz bo‘ylab katta tantanalar, badiiy va g‘azalxonlik kechalari, xalqaro konferensiyalar bilan o‘tkazildi. Yurtimizning olim-u ulamolaridan tortib maktab o‘quvchilari, bog‘cha  tarbiyalanuvchilarigacha barcha ona tilimiz asoschisi, mumtoz adabiyotimizning bebaho durdonalari muallifiga muhabbat, faxr tuyg‘usini his etdi.

Shu qatorda Yunusobod tumanidagi 63-maktab o‘quvchilari ham Nizomiddin Mir Alisher tavalludini munosib nishonladi. “Gulxan” jurnali jamoasi, O‘zbekiston Yozuvchilar uyushmasi vakillari hamda folklor qo‘shiqlar ijrochilari ishtirokida bo‘lib o‘tgan badiiy kecha o‘quvchilarda Navoiy siymosini yaxshiroq tushunish, qalban unga yaqin bo‘lish imkonini berib, uning ijodini chuqurroq o‘rganish ishtiyoqini oshirdi.

Maktab o‘quvchilari o‘qigan g‘azal-u ru­boiylar tadbirning ba­land saviya, yuksak did bilan o‘tishiga sabab bo‘lgan bo‘lsa, ulug‘ shoirning hayoti va ijodi bilan bog‘liq sahna ko‘rinishlari tomoshabinlarni XV asrga, g‘azal mulkining sultoni yashagan yillarga olib bordi. Badiiy kechada so‘zga chiqqan mehmonlar Navoiydan o‘rnak olish, Navoiy ijodini o‘qib-o‘rganishning ahamiyati, shoir asarlarining inson hayotida dasturil amal bo‘lishi haqida gapirdilar.

Ishonamizki, Alisher Navoiy xotirasi yana ming yillar o‘tsa ham nafaqat o‘zbek millati, balki butun dunyo xalqlari orasida alohida ehtirom, yuksak hurmat-e’tibor bilan yodga olinadi. Xalqimizning o‘sib-unayotgan barcha farzandlari qatori Yunusobod tumanining 63-maktabi o‘quvchilari ham Navoiy bobomizga munosib avlodlar bo‘lib yetishishadi.