Kitobsevar  bolalar,  eshitmadim de­manglar.  Siz  “Gulxan”, “G‘uncha”  jur­nal­larida,  boshlang‘ich  sinf  darsliklarida  she’rlarini  mazza  qilib  o‘qigan,  oson­gina  yodlab  olgan  sevimli  shoiringiz Aza­mat Xudoyberganov o‘quvchilarga  yana bir sovg‘a  tayyorladi. Bolajon  shoir­ning “O‘zbekiston” nashriyotida  “Sir­­li sovg‘a”  nomli  to‘plami  chop etil­di.  Shoirning  “Sonlar  sayrga chiq­di”,  “Uyatchang chuvalchang”  nomli  ki­tob­laridagi she’rlarini  o‘qigan   bo­la­lar  uning  nihoyatda  kuzatuv­chanligiga,  tabiatdagi,  bolalar hayotidagi qiziq  ho­lat­larni kutilmaganda  juda quvnoq,  chiroyli  she’r­larga aylantira  olishiga qoyil  qolishgan. Biroq,  bir  ko‘rinishda oddiygina  tuyilgan  bu  she’rlar zamirida  juda  chuqur  mantiq yotadi.  U  bolani  o‘ylashga, xulosa qilishga  o‘rgatadi. Quyida  e’lon  qilin­gan  she’rlarni o‘qisangiz, fikrimizga  qo‘shilasiz.  

 ***

TULKIVOYNING HASRATI

Buncha shirin bo‘lmasa

Bu xo‘rozning ovozi.

Yaqinroqdan tinglashga

Qo‘ymaydi afsus, tozi.

Pisib boray deyman-u

Goho dumim berar pand.

Alamimdan shu sabab

Yeyman doim xo‘rozqand.

***

SHOLGʻOM

Soyabondir yaprog‘im,

Ildizim yer tagida.

Kattarib ketganim rost

Chol-kampir ertagida.

Balki ertak bo‘lmasdim,

Bunday semirmaganda.

It, mushuk tortmaganda,

Sichqon kemirmaganda.

***

“ARZIMAS” HOLAT

Ko‘zoynak taqib bobom,

Gazetasin o‘qirdi.

Buvim orom kursida

Menga paypoq to‘qirdi.

Otamlar-chi berilib,

Televizor ko‘rmoqda.

Ukam beshikda yotib,

So‘rg‘ichini so‘rmoqda.

Opam va kichik singlim –

Ikkisi birgalashib,

Oshxonada yurardi,

Oyimlarga qarashib.

– Xo‘sh, o‘zing-chi, – deysizmi?

E, so‘ramang, qayoqda.

Arzimagan “ikki” deb,

Turibman tik oyoqda.

Azamat XUDAYBERGANOV