Uchtepa tumani 283-maktab qoshida ijodkor o‘qituvchi Muhiba Rajabova rahbarligida tashkil etilgan “She’riyat gulshani” adabiy to‘garagi bugungi sahifamiz mehmoni. Yosh qalamkashlarning eng sara she’rlaridan e’tiboringizga havola qilamiz.

Bolalik

Lolalardan to‘shaldi gilam,

Bahor taqdi chakkamizga gul.

Qaldirg‘ochning qanotlarida

Quvonchlarni tuydik men va ul,

Bolaligim – beg‘uborligim.

Shoshqin daryo bo‘lib oqdik biz,

Kimlarnidir ranjitib qo‘ydik.

Boychechakning qo‘lchalaridan

Tutib, uni dalaga yoydik,

Bolaligim – beg‘uborligim.

Yulduzxon MURODULLAYEVA,

8-sinf

Shokolad

Shokolad, marmeladni

Yaxshi ko‘radi Laylo.

Bog‘cha opasidan ham

Konfet so‘rar doimo.

Shirinlik yegan tishdan

Kariyes joy oladi.

Konfetxo‘r bolalarning

Tishi og‘rib qoladi.

Muhabbat FAYZULLAYEVA,

6-sinf

Mushugim

Mushugim bor – “miyov-miyov”,

Qo‘shni itlar unga zo‘r yov.

Qorni ochsa yolg‘ondakam

Erkalanar menga birrov.

Ovqatni ham tanlab yeydi,

Xushlamasa “miyov”, deydi.

Qorni to‘ysa, bo‘lib xushhol,

Rahmat aytar menga darhol.

Madina RAHMATULLAYEVA,

7-sinf

Ona

Ona borki, olam bor, yurt bor,

Mehr nurin sochadi quyosh.

Ona bilan ko‘ngil xotirjam,

Bizga omad doimo yo‘ldosh.

Ona borki, baxt bor, omad yor,

Xurshid nurin qizg‘anmay sochar.

Yomonlarga yo‘ldosh qilmaydi,

U tolening eshigin ochar.

Ziyoda KARIMOVA,

6-sinf

Tush

Kecha uxlayotgandim,

Ajib bir tush ko‘ribman:

Oltin aravachada

Malikaday yuribman.

Ohista qadam tashlab,

Bir qasrga kiribman.

Shohona dasturxonda

Hatto tushlik qilibman.

Bir suluv ayol kelib,

Qo‘limdan ushlab oldi.

Qarasam oyim ekan,

Attang, tush tugab qoldi.

Dilrabo AHMADOVA,

6-sinf

Kitob

Ma’naviyat bulog‘i,

So‘nmas yulduzsan.

Bobolar o‘giti-la

Buyuk, tengsizsan.

Kitobim – sen oftobim

Yo‘lim yoritgan.

Bekorchi xayollarni

Quvgan, aritgan.

Chinora FAYZULLAYEVA,

5-sinf