***

Bolalar qorbobodan so‘rashibdi:

– Qorbobo, nega qorqizingiz yo‘q?

– Eh, bolalarim, qorqizim sizlarning maqtov, shirin gaplaringizdan erib ketdi.

***

Dilshod oyisiga dedi:

– Oyi, mening dadam qorbobodan qo‘rqadilar-a?

– Nega unday deyabsan? – so‘radi oyisi.

– Chunki har yangi yil kechasida qorbobo kelsa dadam yo‘qolib qoladilar-ku.

***

Dars vaqtida Kozim to‘polon qilgani uchun o‘qituvchisi burchakka turg‘izib qo‘yibdi.

– Sen shu ahvolda katta bo‘lsang, kim bo‘lasan? – debdi jahl bilan ustozi.

Shunda Kozim:

– Men katta bo‘lsam, quruvchi bo‘laman! Burchagi yo‘q sinf xonalar quraman, – debdi.

***

O‘qituvchi “Yashash uchun kurash” mavzusida dars o‘tmoqda.

– Aytinglar-chi, kimsasiz orolga o‘zingiz bilan nima olib ketgan bo‘lardingiz?

– Men och qolmaslik uchun juda ko‘p shirinliklar va ovqatlar olib ketgan bo‘lardim, – dedi Ravshan.

– Men esa zerikmaslik uchun qiziqarli kitoblar, telefonim bilan birga qo‘shimcha quvvatlagichlarini olib ketar edim, – dedi Shuhrat.

– Men orolga Ravshan bilan Shuhratni olib ketar edim, – dedi shunda Jasur o‘rnidan turib.

***

O‘qituvchi o‘quvchilarga debdi:

– Bugun sizlardan imtihon olaman.

– Kalkulyatordan foydalansak bo‘ladimi? – dedi Qodir.

O‘qituvchi:

– Ha, bo‘ladi.

Yana bir o‘quvchi:

– Mendeleyev jadvalidan-chi?

– Albatta, mumkin. Demak, yozib oling imtihon mavzusi “Ikkinchi jahon urushi”.

Hilola HAMDAMOVA tayyorladi.