Assalomu alaykum! “Gulxan” jurnali saytiga xush kelibsiz!

Saytimizda bir-biridan qiziqarli maqolalar, hikoyalar, ertaklar va she’rlarni o‘qishingiz mumkin. Turli fanlarga oid ma’lumotlar bilimlaringizni yanada boyitishga yordam beradi!

Yaxshi bola

Farhodning oyisi yangi qurilgan tandirda yog‘li patirga qo‘shib shirin kulchalar yopdi. Tandirdan qaynoq nonlarni uzib, savatga soldi. Keyin biroz hovuri bosilgan kulchalardan birini olib kosadagi muzday suvga botirdi-da, boyadan beri tandir atrofida o‘ralashib yurgan o‘g‘liga tutqazdi. Yana bir qip-qizil bo‘lib pishgan kulchani sochiqqa o‘rashga tutindi.

– Bu kimga, oyi? – hayron bo‘ldi Farhod.

– O‘rtog‘ing Muzaffarga, non hidi allaqachon hovlilariga chiqqan bo‘lsa kerak, – jilmaydi oyisi, – qo‘shni haqi.

– Yo‘q, Muzaffarga bermayman. U meni hammani oldida “Uyquchi”  deb masxara qilgan, – ko‘nmadi Farhod qovog‘ini solib.

– Voy sen-ey, o‘rtog‘ingning bir og‘iz hazili uchun darrov undan voz kechasanmi?! Bu ishing yaxshimas, o‘g‘lim. Balki u to‘g‘ri gapirgandir. Chunki ko‘pincha uxlab qolib, darsga kechikasan-ku! Ehtimol, u seni xafa qilib qo‘yganidan allaqachon pushaymon bo‘lgandir.  Bordi-yu, xatosini tushunmagan bo‘lsa,  sendan yaxshi muomala  ko‘rsa, albatta tushunadi. Meni aytdi dersan, hali sendan uzr ham so‘rar. So‘ramasa ham mayli. Sen mardlik qil! Do‘stlar bir-birini kamchiligini kechira olishi kerak. Qadimda mard kishilar  nafaqat birodarlariga, hatto dushmanlariga ham yaxshi munosabatda bo‘lishgan. O‘rni kelib qolsa, dushmaniga hadyalar berishgan.

–   Qanday qilib, nega endi dushmaniga sovg‘a berishgan? – hayron bo‘ldi  Farhod.

–   Unda quloq sol, – jilmayib  gap boshladi  Mukarram opa, – bir kuni Hasan Basriy hazratlari (u kishi avliyo bo‘lganlar)  o‘zlarini g‘iybat qilgan kishinikiga bir dasturxon noz-ne’mat yuboribdilar.

Odamlar Hazratning bu  olijanobligidan hayron bo‘lib so‘rashibdi:

–   Nega bunday qilyapsiz, axir u   sizning  obro‘yingizni tushirish uchun tuhmat qildi-ku!

Hasan Basriy bu savolga shunday javob qilibdilar:

– To‘g‘ri, u kishi mening ortimdan yomonlab gunoh qildi. Biroq, u bu qilmishi bilan menga yaxshilik qildi. Chunki u kishi o‘zi sezmagan holda shu choqqacha qilgan xayrli ishlaridan to‘plagan barcha savobini  bizga yubordi. Biz esa unga arzimas hadya jo‘natdik. U bundan to‘g‘ri xulosa chiqarsa, oramizda mehr tiklanadi. Bu bilan  biz   ham nafsimizni yenggan, ham bir adashgan kimsani to‘g‘ri yo‘lga boshlagan bo‘lamiz.

– Ko‘rdingmi o‘g‘lim, yaxshi odamlar raqibiga ozor yetkazmasdan ham to‘g‘ri yo‘lga boshlay oladi.

– Bo‘pti, oyijon! Bobom aytganlar,  men yaxshi bolaman. Beraqoling, kulchani Muzaffarga  olib boraman. Birga yeymiz.

Farhod kulchalarni olib, ko‘chaga yo‘l oldi.

 

Muhabbat  HAMIDOVA

2016–2023 © “Gulxan” jurnali tahririyati. Barcha huquqlar himoyalangan. Saytdan ma’lumot olinganda manba ko‘rsatilishi shart.