Aziz Vatan,

Iqbol vatani,

Qaddi baland,

Qadri balandim,

Yuragimga jo etib seni,

Quchog‘ingda nurga belandim.

Ko‘p narsani sevamiz, ammo

Vatan mehri baridan yuksak.

O‘zga yurtlar gulidan a’lo

O‘z dalangda jilmaygan ko‘sak.

“Vatan” desak ko‘ksingga inib,

Jonday iliq tuyular tuproq.

Shu tuproqda ulg‘ayib-unib,

Shu tuproqqa to‘kilar yaproq.

Vatan degan unvon tuproqqa

Baxsh etilar Inson tufayli.

Vatanidan ketsa yiroqqa,

Insonning ham umri tugaydi.

Tirqiraydi odamzod toshdek,

Yer sopqonday aylansa yo‘rtib,

Vatan sergak yashar quyoshdek,

Farzandlarin bag‘riga tortib.

Goh quloqni etsa hamki kar

Zambarakning sovuq na’rasi,

Ozod tepib turarkan qalblar,

So‘nmas sira hayot nafasi.

Minnatdorman baxtim qushidan:

Ko‘zlarimga qo‘ndirmas g‘ubor

Istiqbolning jilmayishidan

Ravshan tortgan azamat diyor.

Shu sababli mangu sen bilan

Tomirdoshdir bo‘g‘in-u bandim,

Aziz Vatan,

Yagona Vatan,

Qaddi baland,

Qadri balandim.

Husniddin SHARIPOV