Pastqam so‘ri. Ko‘k choy ustida

Aytilmagan gaplar ko‘p hali.

Yana senga  kelaman, buvi,

Anorlaring  pishgan mahali.

Yana she’rlar o‘qiyman senga,

Yana barin tinglaysan mahtal.

Urinasan eslab qolmoqqa

Oppoq soching bersa-da xalal.

Buvi, sening oyoqlaringga

Qaramagim keladi yana.

Ko‘zim tushsa tovoningga gar

Qarimagim keladi yana...

Men bilaman...

Qismatning aytmishi ko‘ksingni

Sandaling cho‘g‘idek kuydirgan.

Men bilaman saharda borib

Dod deyishing o‘g‘ling qabriga.

Bilaman-ku  axir, yashirma,

Hamdard bo‘lay, to‘yib yig‘lab ber.

Men qaribdi, demayman, buvi,

Bemalol egilib yuraver...

Pastqam so‘ri. Ko‘k choy ustida

Suhbatimiz bitmagan hali.

Yana senga kelaman, buvi,

Anorlaring pishgan mahali!

Muattar MAMATKARIMOVA