Atoqli shoir Abdulla Oripov nomidagi ijod maktabini nafaqat Qashqadaryoda, balki respublikamizda ham yaxshi bilishadi. Bu bilimdon va ijodkor oʻquvchilar mehnati tufayli, albatta. Oʻzbekiston Yozuvchilar uyushmasi aʼzosi Nilufar Umarova rahbarlik qilayotgan “Mitti yulduz jilolari” toʻgaragida oʻquvchilar ijod sirlarini oʻrganib, rang-barang mavzularda sheʼr, hikoyalar mashq qilmoqdalar. Ularning ijod namunalari sizga manzur boʻladi, degan umiddamiz.

Soʻz turkumlari olamiga sayohat

Uyquga yoʻl boshladi

Tushlikdagi yegulik.

Bir tush koʻrdim taʼrifi

Bir ashʼorga yetgulik.

Kim? Kim?

Men – Shoh emishman

Soʻzlar saltanatida.

Vazirlarim ham bormish

Bir safda naqd oltita.

Bosh vazirim – OT uchun

Shaxs va narsalar nomi.

Soʻl vazirim – SIFATning

“Qanday?” ga toʻla jomi.

Qancha boʻlsa shuncha koʻp

Tartibni sevadi SON.

Holatini tushunmay,

RAVISH unga xoʻp hayron.

Ish-harakatga masʼul

FEʼL vazirim sal ayyor.

Ot, sifat, son, ravishning

Xizmatiga u tayyor.

OLMOSH vazir – olgʻirim

Bilar ogʻir-yengilim.

Goh Men, deydi, gohi Biz,

Goh U, boʻlar, gohi Siz.

Yumush aytishim hamon

Darrov olib oʻrtaga.

Muhokama boshlashar

Nima? Qachon? Qanchaga?

Vazirlarim nogahon,

Tang qolsa, soʻz demakka.

Koʻmakchi-yordamchilar

Kelar tezda koʻmakka!

O, bunday saltanatni

Koʻrmaganman hushimda.

Xoʻp ahil aʼyonlarga

Podshohmishman tushimda!..

Farid SHODIMURODOV

7-sinf

***

Holat

Samo quyosh nuri ila charogʻon,

Yorugʻlik qoplagan dunyo yuzini.

Shudringlar bir goʻzal

Tizishib marjon,

Ifoda etishar tongning soʻzini.

Javohir ABDURASULOV

7–sinf

***

Jinoyatchi

Qodiriyga dedilar:

– “Qayt jinoyat yoʻlidan!”

– “Gar haqiqatni aytmoq –

Jinoyat, deb sanalsa,

Mayli, jonim qoʻlingda!”

Hikmatbek BOYQOBILOV

7-sinf

***

Abdulla Oripov xotirasiga

Samo koʻzgusini yerga tutgan dam,

Nazmiy gulistonda barq urdi ijod.

Qoʻngʻirtov boʻyida surgancha xayol,

Uni shoir qilib yaratdi hayot.

Soʻzni koʻngil bilan terdi qirlardan,

Koʻzlarin qadagan togʻlar purviqor.

Daryolar mavjiga mudom joʻr boʻldi.

“Vatanim manim” deb kuyladi ilk bor.

Soʻz ila qayradi nazmiy shamshirin,

Qalblarni zabt etdi sheʼrlarin kuchi.

Zarhal satrlarda dur kabi maʼno,

Yurt madhi yangradi koʻklarni quchib.

Sheʼriyat osmonin bezagi boʻlgan,

Ul “Mitti yulduz”da baytlarin bitdi.

Ishq vasfin taʼriflab, koʻklam chogʻida

Muhabbat poyiga guldasta tutdi.

Shonli kunlarini yodimga olib,

Xotirlab yozganim shu bir parcha sheʼr.

Mangu tiriklikning bayoti boʻlib,

Qutlugʻ bir saharda koʻz ochdi shoir.

Gulsevar UMRZOQOVA

9-sinf

***

Hovlimizda bahor

Sernoz daraxt taqadi,

Erinmayin chechaklar.

Quyosh zimdan boqadi,

Jilmaysa boychechaklar.

Tandirin yoqar onam,

Xamirini koʻpchitib.

Ukam varrak uchirar,

Kabutarni choʻchitib.

Dadam ketar bogʻ sari,

Ergashtirib singlimni.

Qaldirgʻochlar chugʻurlar,

Xushlagancha koʻnglimni.

Ariq boʻyidagi tol,

Sochlarini taraydi.

Soʻraganday boʻlib hol,

Gullar kulib qaraydi.

Goʻzallikka koʻz toʻymas,

Yetdik shunday imkonga.

Uch oyga ruxsat olib,

Bahor kelgan mehmonga.

Malika MUHAMMADBOTIROVA

7-sinf

***

Shukuh

Yaltiraydi kumush qor,

Koʻzimga oyna tutib.

Muzlab yotibdi anhor,

Oqmoqlikni unutib.

Qalblarda orzu toʻla,

Barcha shodon, baxtiyor.

Bolalarning koʻzida

Yangi yil shukuhi bor.

Archa oʻyinchogʻida,

Yorqin bir nur porlaydi.

Jilo bor har chiroqda,

Davra sari chorlaydi.

Yaltiroq qor parchasi,

Yulduz sochar borliqqa.

Bunda hech qanday poklik,

Teng kelmas bu yorliqqa.

Sevinch NURIDDINOVA

7-sinf