Yog‘ib o‘tdi oppoq qor tunda,

Bedorlikni tan oldim shunda,

Alyorlarin aytadi kunda,

Qor ostida shivirlar bahor.

Yo‘qotgandi zamin halovat,

Chehrasini ochmas tabiat,

Injiqligi asli haqiqat,

Qor ostida shivirlar bahor.

O‘rik gulin o‘rab oq choyshab,

Qaddi egik ozgina nishab,

Qish ketmadi oshini oshab,

Qor ostida shivirlar bahor.

Qordan bahra oldi dala-qir,

Goh berkinib, Quyosh goh balqir,

Maysa unib kuladi “qiqir”,

Qor ostida shivirlar bahor.

Yurtga yoqqan qor emas-u don,

Oq tilakka o‘raldi har yon,

El duosi asragaydir jon,

Qor ostida shivirlar bahor.

Qor  ostida shivirlar bahor...

Munira  SULTON