Assalomu alaykum! “Gulxan” jurnali saytiga xush kelibsiz!

Saytimizda bir-biridan qiziqarli maqolalar, hikoyalar, ertaklar va she’rlarni o‘qishingiz mumkin. Turli fanlarga oid ma’lumotlar bilimlaringizni yanada boyitishga yordam beradi!

Quyon keldi maktabga

Qurdosh Odinayevning ushbu to‘plamidan joy olgan qirqdan ortq she’rlari mavzu jihatdan rang-barang. Ularda ona Vatanga muhabbat, ustozlarga ehtirom bilan birga bolalarning sho‘xliklarga to‘la dunyosi ufurib turadi. Shuningdek, bu kitobga ijodkorning  ikkita ertagi ham kiritilgan. Ular o‘quvchilarning fikr doirasini kengaytirishga, o‘ylantirishga xizmat qilishga ishonaman.

 

Ne’mat Dushaev

O‘zbekiston Yozuvchilar uyushmasi a’zosi

 

***

Quyon keldi maktabga

Jahl otiga minib.

Direktorni so‘radi

Biroz qovog‘in uyib.

 

Navbatchi o‘qituvchilar

Direktorni topishdi.

Quyonvoyni xonaga

Chorlab eshik yopishdi.

 

Maktab rahbari hayron,

Peshvoz chiqdi quyonga.

Jahl bilan Quyonvoy

Ko‘z tashladi har yonga.

 

–   Jami yetti o‘quvchi

Bizlardan kular emish,

Darslardan qochish uchun

Quyon bo‘lamiz dermish.

 

Ularga chora ko‘ring,

Chaqiring otasini.

Quyonlardan uzr so‘rab

Tuzatsin xatosini.

 

Biz ularga o‘xshagan,

Aslo qo‘rqoq emasmiz!

Bir ishni qilsak agar,

Men qilmadim, demasmiz!

 

Ota-ona aytganin,

Darrov ildam qilamiz!

Birovga ayb yuklashni,

Nomus, or deb bilamiz!

 

Topib bering ularni,

Suratga olay o‘zim.

Ko‘rib qo‘ysin quyonlar,

Ularning asl yuzin!

2016–2020 © “Gulxan” jurnali tahririyati. Barcha huquqlar himoyalangan. Saytdan ma’lumot olinganda manba ko‘rsatilishi shart.