Xatarli o‘tloq

Asalari ko‘ngliga

Ishdan bo‘lak ne sig‘ar?!

Chigirtkalar sakrashgan

O‘tloqda u bol yig‘ar.

Dum chumoli hol so‘rar

Vaziyat borasida:

–  Nima qilib yuribsan

Tentaklar orasida?

***

Ko‘tarma kranlar

Qo‘ymay, bizni har damda

Kuzatib turishgaydir.

Qo‘llarini yordamga

Uzatib turishgaydir.

*** 

Chumolilar inida

–  Ahmoq bo‘lib bu yerda

Izlagandim kimimni.

O‘tkir chaqirtikanlar

Yulib oldi shimimni!

***

Nobop kasal

Keldi bemor kapalak,

Holdan toygan, joni yo‘q.

Eng yomoni, tahlilga

Olish uchun qoni yo‘q.

***

Chaqimchi kurkaga

–  Salobatda o‘zingni

Tuyaqush atasakmi?

Chaqimchilik bo‘yicha

Kuyaqush atasakmi?

***

Nuqsonli chopog‘on

–  Chumolini yugurtsak.

To‘xtab-to‘xtab chopadi.

Bu ahvolda sprint da

Qanday obro‘ topadi?

***

Maymoqvoydan gina

–  Kelvolibsan, bu yerga

Ayt, seni kim chaqirdi?!

O‘zingni otib yerga,

Mayishtirding, paqirni.

***

Chumoliga kiyim-bosh

–  Bari bo‘ldi, bir kemtik

Joyni yopib bo‘lmadi.

Oyog‘iga mos biror

Tufli topib bo‘lmadi.

Turob Yusuf