Lolaqizgʻaldoq

– Ayt-chi, lolaqizg‘aldoq,

Ko‘ksing nega qora dog‘?

– Tabiat degan rassom

To‘kib qo‘yibdi bo‘yoq.

Turnalar

Turnalarmiz, tizilib,

Chiqmaymiz safimizdan.

Saf tortishni o‘rgansin

Askarlar, mana, bizdan.

Hayvonot bogʻida

Umidjon zebra otga

Tashlar ekan hashakni,

Deydi: – Kimdir erinmay

Bo‘yabdi-da eshakni.

Yangi sherik

Non ushlaydigan bo‘ldi

Ukamning qo‘lchalari.

Teng ikkiga bo‘lindi

Oyimning kulchalari.

Oʻyinning toʻlovi

Har kun futbol o‘ynasak,

Oyna tortar jabrini.

Onam to‘lar qo‘shniga

Maoshining yarmini.

Konfetxoʻr koptok

– Konfetni yeb, idishin

Sindirganing nimasi?

– Oyijon, koptogim ham

Konfet yegan, chamasi.

Quyonim

Quyonim juda quvnoq,

Chaqqongina oyog‘i.

Bekinmachoq o‘ynasak,

Ko‘rinadi qulog‘i.

Toshbaqa

Imillaysan, deb menga

Og‘ritmagin boshimni.

Chaqqon bo‘lardim ancha,

Ko‘tarishsang toshimni.

Xolis xizmat

– Tozalangan mayizni

Qayerga qo‘yding, qizim?

– Oyijon, mana dumi,

Mayizni yedim o‘zim.

Savodsizlik sababi

– “Osh” o‘rnida “os” yozding,

Savoding bormi, Qosim?

– Oyijon, qandoq qilay,

Tusib qolgan-da tisim.

Zubayda ESHPO‘LATOVA,

Samarqand davlat universiteti talabasi