O‘ylab ko‘rsam, vaqt degan

Rezinali to‘rxalta,

Neki tiqsang ichiga

Sig‘averar, zo‘r xalta.

Masalan, bir soatda

Nimalar qilish mumkin?

Kitob, gazeta o‘qish,

Samokat minish mumkin.

Do‘sting bilan urishib,

Mumkin hatto yarashish.

Tort yeyayotgan ukangga

“Yordamlashish”, “qarashish”,

Alg‘ov-dalg‘ov qilib so‘ng,

Mumkin yigish uy ichin.

Ko‘chirish mumkin hatto

Telefonda uy ishin.

Ha, shularning bariga

Bir soatgina darkor.

Bir kunda bir soatdan

Yana, eh, qanchasi bor.

Harakat zo‘r bo‘lsa, vaqt

Rezinali to‘rxalta.

Neki tiqsang ichiga

Sig‘averar, zo‘r xalta!

Hamza Imomberdiyev