Nedir Vatan tuyg‘usi? —

Emas mavhum tushuncha.

Ma’nosini anglaymiz,

No‘noqmasmiz biz uncha!

Muallimning qo‘lida

Gazeta-yu kitoblar.

— Yurtni sevmoq iymondan! —

Deb qiladi xitoblar.

Misollarni keltirgay

Goh hadis, goh Qur’ondan.

So‘zlar buyuk zotlarning

Dilidagi surondan!

Har ibora — hikmatli,

Har ibora — murakkab.

Ba’zan mag‘zin chaqolmay

G‘ulu tushar yurakka.

Kimdir aytgan mashhur gap,

Darsda kelmas xotirga —

O‘xshamaymiz yurtparvar

Va fidoyi botirga!

Muallimga qaraymiz

Javdiragan ko‘z bilan.

Qoniqmaydi gapirsak

O‘zimizning so‘z bilan!

Nedir Vatan tuyg‘usi? —

Xayollarga tolarmiz.

O‘zgalarning fikrini

Aytib maqtov olarmiz!

Rustam NAZAR