Vizillab uchgan toshlar

“Shahar”ni vayron qilar...

Tong chog‘i taloto‘pdan

Ko‘z ochishdi arilar.

Qo‘mondon der: —Saf torting!

Va darhol kiring jangga.

Uzum uchun dushmanlar

Tosh otishdi “Vatan”ga.

Arilar birlashdi-yu

Bir mushtga aylandilar.

Tezda havo orqali

Hujumga shaylandilar.

“Qasos!” dedilar — qanot

Qayrildi, nishlar sindi.

Og‘riqqa dosh berolmay

Yov ham ortga chekindi.

Birortasi ori-yu

Vijdonini sotmadi.

Jonni asramoq uchun

Xilvatlarda yotmadi.

So‘ramang shoirlardan,

So‘ramang qarilardan.

Vatanparvarlik ne, deb

So‘rangiz arilardan!

Jamoliddin Qilichov,

Andijon davlat universiteti filologiya fakulteti 1-kurs talabasi