Momom yurgan yoʻllarga

Nazar solaman bugun.

Sochlaridek koʻrindi,

Oydin yoʻllar oq, uzun.

Baxtli boʻlgin, deydilar,

Peshonamga bosib lab.

Talpinaman qoshiga

Issiq quchogʻi sabab.

Buvim nasihatlari,

Qulogʻimga zirakdir.

“Balli”, degan soʻzlari,

Gʻayratimga tirgakdir.

Sochlarimni oʻraman,

Oʻsma qoʻyib qoshlarga.

Buvim aytar: “Kirgaysan,

Men ham kirgan yoshlarga”.

Ona tilim

Asrlar toʻfonidan

Omon oʻtgan tilimsan.

Faxr-la kuylagayman

Seni jon-u dilimdan.

Onamning soʻzlaridan

Singding jon-u quloqqa.

Oʻxshatgayman men seni

Yoʻl yoritar chiroqqa.

Har bir soʻzing naqshinkor,

Sensan poklik daʼvati.

Sehring-la koʻrkam erur,

Koʻnglimning husnixati.

Nazokat SHARIPBAYEVA,

Qoraqalpoq davlat universiteti talabasi