Koʻzlar begonamas, yillar begona,

Xazonlar toʻkilgan yoʻllar begona.

Tarovating koʻrib uzolmadim koʻz,

Men seni sogʻindim qadrdonim, kuz.

Giyohlar, daraxtlar sendan olgan rang,

Yulduzlar porlagan, bir bora qarang.

Chiroying oldida lolu hayron koʻz,

Men seni sogʻindim musavvirim, kuz.

Sen kelsang, shodlikdan yayrab ketar jon,

Orzularga toʻlib turaman har tong.

Saxovatingga hech tegmasin koʻz,

Men seni sogʻindim serhimmatim, kuz.

Oyingday tovlangan bogʻlar chiroyli,

Dehqonning quvonchi sen kuz tufayli.

Taʼrifingga ojiz ming sehrli soʻz,

Men seni sogʻindim mehribonim, kuz.

Kumush OMONOVA,

Surxondaryo viloyati Shoʻrchi tumani

3-maktab 7-sinf