Tadbirkor ayiqpolvon

Ayiqpolvon tadbirkor

Boʻlishni xohlab qoldi.

Doʻkon ochdi va unga

Turfa shirinlik soldi.

Oʻtirardi gerdayib,

“Savdosi boʻldi qanday?” –

Deganlarga javobim

Eshiting, mana bunday:

Bir hafta oʻtmay ayiq,

Puliga kuygan emish.

Chunki bor mahsulotin

Oʻzi yeb qoʻygan emish.

Xayol

Yulduzlardan tizib koʻzmunchoq,

Qoʻllarimga taqib olaman.

Oy nuriga yoʻgʻrilgan soʻzim

Chertkilayman, kuyga solaman.

Koʻk – soyabon, poyoni cheksiz,

Yel bagʻrida oʻylab tolaman.

Oymomodek oppoq bolishni

Quchoqlayman, uxlab qolaman.

Charos RAHIMQULOVA,

Samarqand viloyati Narpay tumani

NDPI oʻzbek tili va adabiyoti fakulteti 2-bosqich talabasi