Assalomu alaykum! “Gulxan” jurnali saytiga xush kelibsiz!

Saytimizda bir-biridan qiziqarli maqolalar, hikoyalar, ertaklar va she’rlarni o‘qishingiz mumkin. Turli fanlarga oid ma’lumotlar bilimlaringizni yanada boyitishga yordam beradi!

Bayramlarga boy fasl

Ko‘klamni sog‘ingan dillarga quyoshning iliq nurlarini ulashib, o‘lkamizga bahor fasli tashrif buyurdi. U har yili quchog‘ini gul-u chechaklarga to‘ldirib, qo‘shaloq-qo‘shaloq  bayramlarning qo‘lidan tutgancha  keladi.  Bu yil  ham har yilgidek, eng  avvalo, O‘zbekiston xalq shoiri Zulfiyaxonim tug‘ilgan kunni nishonlash bilan bahorga peshvoz chiqdik. Zulfiya tavalludining 105 yilligi munosabati bilan yurtimizning turli maskanlarida shoi­raning hayoti va ijodiga bag‘ishlangan adabiy kechalar, qiziqarli uchrashuvlar bo‘­lib o‘tdi. Biz ham jurnal ijodkorlari bilan  Respublika bolalar kutubxonasi va bir qator maktablarda tashkil etilgan tadbirlarda ishtirok etdik. Zulfiyaxonim haqida bilganlarimizni, o‘qi­ganlarimizni  yig‘ilganlarga so‘zlab berdik.

Bir necha kun o‘tib O‘zbekiston Res­publikasi Prezidentining 8-Mart Xalqaro xotin-qizlar kuniga bag‘ishlangan tantanali marosimdagi nutqini tingladik. Ushbu tab­rikdagi ayrim satrlarni yana bir bor eslab, siz jurnalxonlarga taqdim etishni joiz topdik.

“...Yer yuzida ongli hayot paydo bo‘libdiki, odamzod muqaddas ona siymosini, ayol zotini ulug‘lab, sharaflab keladi. Onalarimiz sharofati bilan Vatanimiz bog‘lari jannat bog‘laridek go‘zal va mo‘tabardir. Onalar duosidan yurtimiz tinch, osmonimiz musaffo, ishimizda unum,  hayotimizda baraka bor.

...Muhtarama ayollarimizdan 16 na­fa­ri Vatanimizning eng oliy mukofoti – “O‘zbekiston  Qahramoni” unvoniga sazovor bo‘lgani barchamizni quvontiradi. Xotin-qizlarimiz o‘rtasida fan doktorlari, professor va akademiklar, “Xalq o‘qituvchisi”, “Xalq shoiri”, “Xalq artisti” unvonlariga sazovor bo‘lgan yuzlab opa-singillarimiz borligi – bu bizning faxrimiz... Yurtimizda iste’dodli qizlarimizning qobiliyati va salohiyatini ro‘yobga chiqarish, ularning intilishi va mehnatini munosib qadrlashga alohida e’tibor berilmoqda... Ular o‘zlarining samarali meh­nati, yorqin iste’dodi, ibratli fazilatlari bilan barcha tengdoshlariga o‘rnak bo‘ladilar, deb ishonaman...”

Bolalar davrasida bo‘lganimizda ulardan “Mart oyida yana qanday bayramlar bor?” deb so‘radik. Deyarli barcha bolalar  1-, 8-, 21-martdagi bayramlarga ta’rif berishdi-yu, qolgan muhim sanalar haqida bilmasliklari ayon bo‘lib qoldi. Shu savolni  Toshkent viloyatidagi yana bir maktab bo­lalariga berdik. Ularda ham  javob yo‘q. Demak o‘quvchilarga bu haqda hech kim ma’lumot bermagan ekan-da deb, quyidagi muhim sanalarni doimo yodda tutishlarini aytib, ularga izoh berdik:         

1-mart – O‘zbekiston Qahramoni, adabi­yotshunos olim Ozod Sharofiddinov tug‘ilgan kun.

2-mart – Mustaqil O‘zbekiston respublikasi BMTga qabul qilingan kun.

21-mart – O‘zbekiston Qahramoni, Xalq shoiri Abdulla Oripov tug‘ilgan kun.

21-mart – Butunjahon she’riyat kuni.

22-mart – Buyuk o‘zbek astronomi va matematigi, “Ziji Ko‘ragoniy” astronomik jadvalining yaratuvchisi, Amir Temurning nabirasi Mirzo Ulug‘bek tug‘ilgan kun.

22-mart – BMTning atrof-muhitni mu­­ho­faza qilish konvensiyasiga muvofiq ni­shonlanadigan Xalqaro obihayot kuni.

27-mart – Xalqaro teatr kuni.

Olamni yashillikka, gullarga burkab ki­rib kelayotgan Navro‘zi olam muborak bo‘lsin, aziz muxlislar! Yangi O‘zbekistonda yangilanishlar fasli  bor bisotini atrofga ko‘z-ko‘z qilib,  sochib yubordi. Bahorning nafis ranglari  tabiatdan odamlarning yuz-ko‘ziga, kayfiyatiga ko‘chib, butun borliq shodlikka burkandi. Ana shu shodlik va bahoriy kayfiyat barchamizga hamisha hamroh bo‘lsin.

2016–2023 © “Gulxan” jurnali tahririyati. Barcha huquqlar himoyalangan. Saytdan ma’lumot olinganda manba ko‘rsatilishi shart.