Maktabimizda tashkil qilingan “Yosh qalamkash” to‘garagining yarmidan ko‘pi mening sinfdoshlarimdan iborat. Chunki adabiyot ustozimiz Zumrad opa Qurbonova hammamizni badiiy asarlar o‘qishga, ijod qilishga qiziqtirib qo‘yganlar. Sinfdoshim Zuhra ko‘p kitob o‘qigani uchunmi allaqachon  she’r, hikoyalar yozishni boshlab yuborgan, to‘garak rahbarimizning o‘ng qo‘li. Ikkita she'ri  bolalar gazetasida chiqqan.

Yil yakunida ustozimiz yosh qalamkashlar orasida “Mening Prezidentim” mavzusida insholar tanlovi  e’lon qildilar. Aynan tanlov o‘tadigan kuni  Zuhra negadir mashg‘ulotga kelmadi. Ustoz biroz kutib turishimizni, Zuhra bu tanlovda qatnashishni juda-juda xohlaganligini aytib, “Ehtimol inshoni vaqtliroq yozib ham qo‘ygandir”, – deb  qo‘shib qo‘ydilar.

– Ularning uyi shundoqqina mak­tabimiz yonida. Chaqirib kelaymi? – so‘radim   ustozni  xursand qilish uchun.

–    Mayli boraqol, – sevinib ketdi ustoz...

Darvozani uning onasi ochdi. – Zuhra nega  mashg‘ulotga chiqmadi, ustoz so‘rayotgandi, – dedim qo‘limni ko‘ksimga qo‘yib salom bergach.

–    To‘garakka chiqish  majburiy  emas-ku. Nega so‘raydi. Qizimning tomog‘i og‘riyapti. Ikki-uch kun  maktabga borolmaydi, – dedi oyisi   menga boshdan oyoq  razm solib  qovoq uygancha...

 Oradan ikki  kun  o‘tib dushanba  kuni  sinfdoshim maktabga keldi.

–    Tuzalib qoldingmi? – dedim unga peshvoz chiqib. U menga bir zum qarab turdi-da, indamay o‘tib ketdi. Shu kuni ham, ertasiga ham u men bilan gaplashmadi. Dugonasi  Muxlisaning  aytishicha, o‘sha kuni onasi uni “nega seni o‘g‘il bola uygacha qidirib keladi”, –  deb rosa koyibdi.  Va o‘g‘il bolalar bilan iloji boricha kam gaplashishi kerakligini, aks holda boshqa maktabga o‘tkazib yuborishini aytibdi.

Balki uyiga borib xato qilgandirman. Endi bunday qilmayman, nafaqat uning, boshqa sinfdosh qizlarning ham uyiga bormayman. Ammo, bitta sinfda o‘qib turib qanday qilib gaplashmaslik mumkin. Sezyapman, bundan Zuhra ham xafa. Axir biz  do‘st edik-da.

Gulxanjon, shu to‘g‘rimi? Biz 6 yildan buyon birga o‘qiyotgan bo‘lsak. Sinfdosh o‘g‘il bola bilan qiz bola gaplashishi mumkin emasmi? Qolaversa, bitta mahallada   yashasak, bitta maktab, bitta sinfda o‘qisak. Buvim, mahalladagi qizlarning biri  opa, biri singil bo‘ladi. Ularni hurmatini joyiga qo‘y, og‘irini yengil qil, deb tayinlaydilar.

Kim haq o‘zi, sinfdoshimning oyisimi, mening buvimmi?

Azizbek Ibrohimov,

Yashnobod tumanidagi 341-maktab o‘quvchisi