Toshkent viloyati Bo‘ka tumanidagi  “Barkamol avlod” bolalar maktabida 2021-2022 o‘quv yilining yakuniga bag‘ishlangan “Dunyo bolalar bilan go‘zal” deb nomlangan tadbir bo‘lib o‘tdi.

Maktabda o‘quv yili davomida 7 yo‘nalish bo‘yicha 42 ta to‘garak faoliyat olib bordi. Bu yo‘nalishlar:

– Madaniyat va san’at;

– Texnika, konstruktorlik va modellashtirish;

– Jismoniy tarbiya va sport;

– Hunarmandchilik va qo‘l mehnati;

– Turizm va ekologiya;

– Oliy ta’lim muassasalari va maktabga tayyorlov;

– Xorijiy tillar yo‘nalishlari.

12 ta to‘garak “Barkamol avlod” binosida, 27 tasi tumandagi umumta’lim maktablarida, 3 ta to‘garak shahardagi 15-Mehribonlik uyida o‘z ishini yo‘lga qo‘ydi. To‘garaklarda 1500 nafar o‘quvchi o‘zlari tanlagan fanlar va kasb-hunarmandchilik mashg‘ulotlarida malakali ustozlar  qo‘l ostida shug‘ullanishdi. 

Shu kuni  ta’tilda bolalarni  maktabga yanada ko‘proq jalb qilish bo‘yicha targ‘ibot ishlari o‘tkazildi. Ota-onalar bilan suhbatlar, to‘garaklar yarmarkasi, mahorat mashg‘ulotlari va konsertlar tashkil qilindi.

Shahrizoda SANAQULOVA