Biz beg‘ubor bolalarmiz,

Qalbimizda sayroqi soz.

Ochilgan gul lolalarmiz,

Cheksiz bizda orzu-havas.

Vaqt tizgini qo‘limizda,

Qaynab toshar dilda ilhom.

Quyosh porlar yo‘limizda,

G‘ayratlimiz ham peshqadam.

Gul hayotni tinim bilmay,

Kecha-kunduz kuzatamiz.

Xizmatlarga turibmiz shay,

Nosoz joyni tuzatamiz.

Ezgulik deb ko‘ngil ochib,

Birlashamiz omma bilan.

Dunyo bo‘ylab mehr sochib,

Do‘st bo‘lamiz hamma bilan.

Yaxshi tomon yuzni burib,

Otni sekin qamchilaymiz.

Ona yerga ko‘kdan turib,

Nayson bo‘lib tomchilaymiz.

Xurram RAIMOV