–   Rayxona, qayerdan kelyapsan? – qo­rong‘ida shoshib-pishib kelayotgan qo‘sh­nisidan so‘radi  Mushtariy.

–   Sport zaldan, bugun mash­g‘ulo­tim bor edi.

–   Voy, shunaqa kech chiqasanmi, qayerda shug‘ullanasan?

–   Yangioboddagi maktabda. Vaqtli chiq­qandim, avtobus kutib kech qoldim, – dedi hansirab  Rayxona.

– Qaysi sport bilan shug‘ullanasan, o‘zi?

–   O‘zbek jang san’ati bilan.

– O‘rtoqjon, axir mahallamizdagi 342-­maktabda ham shunday to‘garak tashkil qilingan-ku. Atrofimizdagi ko‘p­chilik o‘sha yerga boradi. Sport zali ham  shahardagi  zallardan  qolishmaydi. Yorug‘, keng. Shug‘ullanishimiz  uchun  hamma sharoit bor. Nahotki, har kuni  o‘sha maktab yonidan o‘tib bu haqida  eshitmagan bo‘lsang?! Men ikki yildan  buyon  o‘sha yerda shug‘ullanaman. Ikki marta  viloyat  chempioni bo‘ldim. Biz tushdan  keyin o‘qiganimiz  uchun  mashg‘ulot  ertalab bo‘ladi.  Darslarga ham ulguraman.

–   O‘-ho‘-o‘, viloyat chempioniman de­gin.  Mening  ham orzum – chempion  bo‘­lish. Eshitmagan ekanman, dadam ham indamagandilar.  Oyiga qancha  so‘m to‘laysan?

–   Hech qancha, mashg‘ulotlar be­pul. U yerda ikkita guruxga qirqta  bola  shug‘ullanamiz.

–   Dugonajon, dadam bilan gaplashib ko‘ray, balki men  ham  shu yerga sen bilan birga qatnasharman. 

Rayxonani  trener –  2-DAN qora  belbog‘ sohibi,  mamlakat  va  Osiyo  o‘yinlari  chempioni  Ahror  aka  Sodiqov  ochiq chehra  bilan  kutib  oldi. Bu sport turini  nega tanlaganini  so‘radi. Mashq  qildirib, harakatlarini kuzatdi.

–   Yomon emas, oyoq harakatlaring  sal zaif. Hechqisi yo‘q, o‘rganib ketasan. Tushunmaganlaringni dugonangdan so‘rab olasan. Balki o‘zaro kuch ham sinasharsizlar. Axir,  siz To‘maris  avlodisiz, – daldali  ohangda dedi  Ahror aka. – Sizdan talab qilinadigani – qat’iy intizom, mustahkam iroda, qat’iyat, tirishqoqlik. Bularsiz yaxshi natijaga  erishib bo‘lmaydi. Mushtariy aytgandir, sababsiz birorta mashg‘ulot qoldirish mumkin  emas. Yana mashg‘ulotlar darslarni  yaxshi o‘zlashtirishingizga  xalaqit bermasligi kerak. To‘garagimiz  shiori: Iymon, kuch, adolat. Har bir mashg‘ulotda  shunga amal qilsangiz tez kunda, Mushtariy, Odina kabi  chempion  qizlarimiz  qatoridan joy olasiz, – dedi  murabbiy ishonch bilan.

O‘sha voqeaga ham mana ikki yil  bo‘ldi. Bugun murabbiyning  topshiriqlarini   mahorat bilan  bajarishga harakat qilgan Rayxona ham qator yutuqlarni qo‘lga kiritdi. Tuman va  viloyatga tanildi.

Vatanimiz kelajagi bo‘lgan o‘g‘il-qiz­larimizning har bir kunini mazmunli, samarali o‘tishiga xizmat qilayotgan bu to‘garak 2018-yilda Qibray tumani sport maktabi tashabbusi bilan tashkil qilingan. Mana salkam besh yildirki, bu to‘garak “Hilol”, “Ibrat”, “Mirishkor” mahallasidagi (bu bolalar Yashnobod tumanidagi 152-,339, 341 va 342-maktablarda o‘qishadi)  sportsevar bolalarning  mahoratini oshirishga, o‘zligini  topishiga, sog‘lig‘ini mustahkamlashgagina xizmat qilib qolmasdan,  O‘zbek jang san’ati sport turini rivojlanishiga, iqtidorlarni yuzaga chiqishiga xizmat qilmoqda. Ahrorning  shogirdlari – Rayxona Nig‘matullayeva, Qurbonmurod Xurramov, Jasur Bahodirov, Po‘lat Umarovlar avval Toshkent viloyatida,   shahar hududiga o‘tgach esa poytaxtdagi  eng tirishqoq, eng  mahoratli sportchilar sifatida tanildi. Nufuzli  musobaqa, bellashuvlarda ochiq chempionatlarda muvaffaqiyatli  ishtirok etmoqda. Mushtariy Choriyeva, Odina Obidjonovalar respublika chempionatida g‘olib bo‘ldilar. Yana bir mamlakat chempioni  Asad Almatov yaqin kunlarda Qozog‘istonda  o‘tkaziladigan Osiyo  chempionatida qatnashish imkoniyatini qo‘lga kiritdi. Biz  yuksak sinov oldida turgan  Asadbekka ham, jamoaning barcha  a’zolariga ham yuksak muvaffaqiyatlar tilab qolamiz.

Muhabbat HAMIDOVA