Til o‘rganing, dil bog‘lang, 

Bir-biringiz ardoqlang! 

Marralar sari chog‘lang, 

Degan jadid bobolar. 

Fikrda, ishda birlik, 

Nur kerak, emas kirlik. 

Xalqlar aro totuvlik, 

Degan jadid bobolar. 

El-yurt baxti, rivoji, 

Bilim – ma’rifat toji. 

Yoshlik yuksalish avji, 

Degan jadid bobolar. 

Jismimiz tuproq, loydan, 

Yerdan, dengizdan, oydan. 

Ilm izlang Xitoydan, 

Degan jadid bobolar. 

Cho‘lpon, Behbudiy, Ibrat, 

Fitratlar bizga ibrat. 

Bosmasin qalbni g‘aflat, 

Degan jadid bobolar. 

Palagi toza elmiz, 

Birlashsak kuchmiz, selmiz. 

Xalq to‘lqin, jo‘shqin dengiz, 

Degan jadid bobolar. 

O‘rganishlardan qaytmang, 

Chopag‘on bo‘lsin yo‘rg‘ang. 

Luqmani halollab yeng, 

Degan jadid bobolar. 

Yangilik, taraqqiyot, 

Ilm-fan, adabiyot. 

Gullasin turmush, hayot, 

Degan jadid bobolar.

Ravshan ISOQOV