EZGULIK ELCHILARI

Bolaligimda ma’naviy ko‘­­­makka muh­toj, tashna edim. Us­toz­larim meni kitob­xonlikka yo‘naltira bildilar. 7-sinfga o‘tar chog‘im ruhimda keskin ijobiy, ijodiy o‘zgarish bo‘ldi. Maktabimizdagilar me­ni muxbir va shoir sifatida taniy boshladilar. Badiiy adabiyotga “sho‘ng‘ib”, uning zilol chashmalaridan chanqog‘imni qondirayotganimni o‘zim ham sezmay qolibman... Xuddi shu bois birinchi o‘qituvchim Sanobarxon Xudoy­berdiyeva hamda ona tili va adabiyoti fani fidoyisi Ergashxon Ali­yevadan cheksiz min­natdorman. (Oxi­rat­lari obod bo‘lsin!)

ERTAKLAR

Ertaklarga erta elakishganman. El­ma-el e’zozlangan ertaklarga. Esim­da: enaxonlar-u onaxonlar evaralar-u na­biralarini ergashtirib, egatlarga egilib ezilganlarida ertaklarimni entikib eshi­tishardi. Eshitganda esnashmasdi. Erin­masdan eshitishgan. Eng e’tiborlisi,   enaxonlar egachisi Ergashoy enamiz ertasiga “Ekstra” elektr elagichni eh­son etganlar. Esdalikni ehtirom-la eh­tiyotlayman. Erinchoq “eskimos”lar esa eplab eski elakda elayversin! Elektr –ekonom...

Endilikdagi “ertaksevar”lar ertalab­danoq ekran “erkatoy”lari.  Eski ertaklarni eslashmaydiyam!.. Ehtimol, erinishar. Ehtimol...

Ertaklar – ezgulik elchilari.

Ezgulik esa eskirmaydi!

SIM-SIM ESHIKNI OCH!

Prezidentimiz: “Kitob o‘qigan bola, televizor ko‘radigan o‘nta bolani boshqarishi mumkin”, deganlar. Mamlakat rahbarining bu fikriga yuz ellik foiz qo‘shilaman. “Iy-yi, yana ellik foizini qaydan oldingiz, deysiz-da! Kitobsevar bolaligim va o‘smirligimdan.

Shahrimizdagi “Amiriy” nomli axborot-kutubxona markazining muhtasham binosi oldida xotiralar og‘ushida turibman, xuddi ertakdagi Alibobo singari. Kutubxona –ma’naviy xazina, kutubxonachilar esa –xazinabonlar. Ularning ko‘pchiligini uzoq vaqtlardan beri taniyman,  qadrdon bo‘lib ketganmiz. Ular Dilnozaxon Sobirova, Nargizaxon Turdimatova, Mahfuzaxon Nishonova, Dilnozaxon Qo‘ziyeva, Barnoxon Abdullayevalardir.

Ommaviy haftalik ichida o‘zbek va tojik xalqlarining atoqli yozuvchisi Sadriddin Ayniy tavalludining 145 yilligiga “Sudxo‘rning o‘limi” asarining taqdimoti tashkillashtirildi.

– Haftalikda O‘zbekiston Milliy kutub­xonasi direktori Umidaxon Teshaboyeva ham qatnashib, “Turkiy adabiyotlar durdonalari” taqdimotini o‘tkazib berdilar, – dedi kutub­xonaning axborot bibliografiya xizmati rah­bari Dilfuzaxon Qo‘ziyeva.

KITOB

Yoshi katta “bola”man –

Oq tolalar boshimda.

Kitobni do‘st bilganman,

Bosh egaman qoshida.

Kitob dilga yorug‘lik –

Quvvat olib kiradi.

Meni etdi taniqli,

Qalbimga zavq beradi.

Sobir JABBOR