Negmurod Guliyev Buxoro viloyati Gʻijduvon tumanidagi 57-maktabda uzoq yillar matematika fanidan oʻquvchilarga saboq berdi. Badiiy ijod bilan ham muntazam shugʻullanib kelmoqda. U “Shuhrat” medali sohibi, qator kitoblar muallifi. Quyida shoirning matematik masalalarni sheʼriy yoʻl bilan ifodalab yozgan ijodidan namunalar bermoqdamiz. Zehningizni sinab koʻring.

Benzin sarfi

“Damas” avtomobili

Yuz chaqirimli yoʻlga,

Olti litr yonilgʻi –

Ketkizar, maʼlum elga.

Yuz sakson kilometr

Marrani qishin-yozin,

Zabt etmoqchun mashina –

Sarflaydi qancha benzin?

Geron formulasi

Uchburchak tomonlari –

Oʻn-u, oʻn-u, oʻn olti.

Yunon Geron bobomning

Dunyoga mashhur oti.

Olim formulasin yoz,

Ish yurishar anchaga.

Top-chi, shaklning yuzi,

Teng boʻladi qanchaga?

Parallelogramm

Perimetrin oʻlchasak,

Bir yuz yigirma butun,

Bir yon ikkinchi yondan

Yigirma toʻrtga uzun.

Parallelogrammni –

Siz bilasiz, anchadan.

Toping, tomonlarining

Har bittasi qanchadan?

Vatar uzunligi

Markazidan naq sakkiz –

Metrda bir nuqta bor.

Oʻn metr radiusli

Aylana chizdi Abror.

Xoʻsh ayting-chi, nuqtada

Diametrga tik qilib –

Oʻtkazilgan vatarning

Uzunligini bilib?

Qaysi ogʻir

Beshta bir xil apelsin,

Oltita bir xil nokdan,

Oʻlchasak tarozida

Biroz ogʻirroq ekan.

Bundan qilib xulosa –

Qaysi vazmin, topilsin:

Yettita bir xil nokmi,

Yoki olti apelsin?!

Turistik sayohat

Turistik sayohatda

Oʻquvchi, erkak, ayol.

Jami yigirma kishi

Manzil tomon oldi yoʻl.

Yukxaltalar turlicha,

Mos ravishda bu taxlid.

Toʻrtdan bir, yarim, ikki,

Hammasi yigirma pud.

Safarga chiqqanlarning

Sonini topish kerak.

Xoʻsh, ayting-chi, nechtadan

Oʻquvchi, ayol, erkak.