1955-yil 20-martda Toshkent viloyati Qibray tumanidagi Tuzel qishlog‘ida dehqon oilasida tug‘ilgan. 1971-yilda Tuzel qishlog‘idagi 36-maktabni tugatgan. 1971-77-yillarda Toshkent Davlat universiteti (hozirgi O‘zMU) jurnalistika fakultetining kechki bo‘limida o‘qidi. Ish faoliyatini 1972-yilda “Toshkent binokori” gazetasida musahhihlikdan boshladi. 1973-1974-yillarda “Tong yulduzi” (“Lenin uch­quni”) bolalar gazetasi tahririyatida xatlar bo‘limi xodimi bo‘lib ishlagan. 1975-yilda Respublika o‘quvchilarining adabiy-badiiy bezakli jurnali “Gulxan” tahririyatiga matn teruvchi vazifasiga ishga o‘tgan. Shu jurnalda musahhih, xatlar bo‘limi hisobchisi, adabiy xodim, bo‘lim muharriri, mas’ul kotib vazifalarida samarali faoliyat olib borgan.

1979-yildan buyon O‘zbekiston jurnalistlar uyushmasi a’zosi.

Birinchi kitobi – “Izingizdan boramiz” nomi bilan 1981-yilda chop etilgan.

1991-yilda “O‘zbekiston Xalq ta’limi a’lochisi” nishoniga sazovor bo‘lgan.

1995-yildan 2012-yilgacha “Gulxan” jurnalida bosh muharrir o‘rinbosari, adabiyot va san’at bo‘limi muhariri lavozimida ishlagan. Jurnal qoshida tashkil qilingan “Jajji jilg‘alar” nomli yosh qalamkashlar to‘garagiga rahbarlik qilgan. To‘garak a’zolari Dilnavoz Najimova, Dilsora Abdusattorovalar “Kelajak ovozi” respublika tanlovi g‘olibi, Y. O‘rmonova, M. Dadaboyevalar Zulfiya nomidagi Davlat mukofotiga sazovor bo‘lishdi.

1997-yilda O‘zbekiston jurnalistlar uyushmasi tomonidan o‘tkazilgan “Yilning eng yaxshi jurnalisti” tanlovi g‘olibi bo‘lgan.

1998-yilda “Shuhrat” medali bilan taqdirlangan.

2000-yilda “Yangi uch og‘a-ini botirlarning sarguzashtlari” nomli qissasi “Bolalar uchun yozilgan eng yaxshi kitob” tanlovi g‘olibi bo‘ldi. 1983-yilda “Asabingizni asrang” hajviy hikoyalar to‘plami, 2006-yilda “Qora jo‘ja” nomli kitobi, 2008-yilda yoshlar tarbiyasiga oid “Aldanganni aldama” kitobi, “Sehrgar bola” kitobi bosmadan chiqdi. “Kokilli ilon”, “Hakka xolaning hangomasi”, “Topishmoqmi yo tez aytish” qissa va hikoyalar to‘plamlari, “Firdavsning sarguzashtlari” qissasi chop etildi. Hikoyalari “O‘zbek bolalar antalogiyasi”ning so‘nggi nashridan joy olgan.

2010-2018-yillarda “Yilning eng faol jurnalisti” tanlovi g‘olibi bo‘lgan.  U 1998-yilda “Shuhrat” medali, 2023-yil II darajali “Sog‘lom avlod uchun” ordeni hamda “Mehnat faxriysi” ko‘krak nishoni bilan taqdirlangan.   O‘zbekiston Yozuvchilar uyushmasi a’zosi.