Gullar tabiatning eng nozik mo‘jizalaridan biri. Ular nafaqat atrof-muhitni bezaydi, balki inson qalbiga iliqlik, shodlik va ilhom bag‘ishlaydi. Ayrimlar gullarni shunchaki bezak, bayramga sovg‘a sifatida ko‘rsa, boshqalar ularni yurakdan sevadi, parvarish qiladi va hayotining bir bo‘lagiga aylantiradi.

Malika xola Teshavoyeva turmush o‘rtog‘i bilan birga Chorsu gul bozorida qariyb yigirma yildan buyon o‘zlari yetishtirgan xona va hovli gullari, manzarali daraxtlarini sotib, kishilarga quvonch, estetik zavq, ekologiyamiz­ga esa ya­ngi kislo­rod manbalarini yetishtirib beradilar. “Biz ishi­miz­ni pomi­dor sotish bilan boshlagandik. Hovlimizda, issiqxonada pomidor yetish­tirib so­tar­dik. Gullarni esa bo­la­ligim­dan yax­shi ko‘­raman. O‘sha vaqtlar ham gullarimiz anchagina edi. Bora-bora har yili erta bahorda qo‘ni-qo‘shni, qarindosh-urug‘­larimizga gullar, ko‘­chatlar be­radigan bo‘ldik. Vaqti kelib, hozirgi gul­chilik biznesi­mizni bosh­lash uchun yetarli kattagina issiqxonamiz, gul­­lari­mizga ega bo‘l­­dik. Ti­rik­chiligimiz ham gul­lar bi­lan bog‘­lanib, ho­zir bor yerimizda gul ko‘chatlari o‘s­ti­ra­miz. Daromadimiz yaxshi, insonlarga, tabiatga foydamiz tegayotganidan ham xursandmiz”, – deydi Malika xola o‘zining uzoq yillik mehnatlarini iftixor bilan eslab.

Bugun u kishining o‘n uch nevarasi bor. Ular ham darsdan bo‘sh vaqtida, ta’til kunlarida bobo-buvilariga yordam berib, gullarni parvarishlash, o‘stirish, ko‘paytirish borasida ancha pishib qolishgan. Malika xola ularning dastyorligi haqida gapirarkan, shunday dedi: “Nevaralarim ham o‘zimizdek mehnatsevar, tabiatga, gullarga muhabbati baland bo‘lib o‘sganidan juda xursandman. Ularga bog‘bonlik sir-asrorlarini o‘rgatishdan hamisha mamnun bo‘laman, boisi, bu ham bir hunar. Axir, hunardan rizqing unar, deyishadi-ku”.

Sevimli mashg‘uloti bo‘lgan gulchilik ortidan ham savobli ish, ham yaxshi daromad qilayotgan onaxon nevaralariga doim takrorlab keladigan nasihatlarini “Gulxan” jurnalining o‘quvchilari ham bilib qo‘yishlarini istadilar: “Avvalo, yaxshi o‘qish kerak, bilimsiz hech bir ish qilib bo‘lmaydi. Shuningdek, jismoniy mehnatni ham unutmaslik kerak. O‘quvchilar, o‘qib-o‘rganishdan bo‘sh vaqt­larida ota-onalariga qarashishlari lozim. Qimmatli vaqtingizni behuda o‘tkazgandan ko‘ra foydali ish bilan shug‘ullaning, mehnat baxt keltiradi. Yoshligidan mehnatni sevgan, mehnat bilan katta bo‘lgan bola hech qachon dangasa ham, kasal ham bo‘lmaydi. Mana men, yoshlik chog‘imdan gullarga mehrim baland edi, hozir ular hayotimning ajralmas qismi. Ishim, ermagim, da­roma­dim – ham­ma­si gul­lar bilan bog‘langan. Dunyoni “gul” qilsam deyman”.

Muhammadali PO‘LATOV