Qo‘ligul qiz
Barchinoy Shavkatova Toshkent shahar, Sergeli tumanidagi 104-maktabning 11- sinfini tamomladi. U izlanuvchan, o‘z ustida ishlaydigan qiz: kashta tikadi, munchoqdan tillaqosh, gul, zanjir yasaydi. Jemper, do‘ppi, nimcha va o‘yinchoqlar to‘qishni, tikishni biladi. Pazandachilik kursida o‘qib, turli shirinlik va tansiq taomlar pishirishni o‘rgandi. Pianino, gitara chalib, qo‘shiqlar aytadi. Shuningdek, basketbol, voleybol, futbol, stol tennisi bilan shug‘ullanib, tumanda faxrli o‘rinlarni egallagan. Yana rus va ingliz tillarida erkin gaplasha oladi. U 2020-yil Sergeli tumanida “Besh tashabbus” loyihasi bo‘yicha o‘tkazilgan “Qizlarjon” nomli ko‘rik-tanlovda birinchi o‘rinni egalladi.
Barchinoy portret, natyurmort, peyzaj usulida chiroyli rasmlar chizadi. Bu iqtidor onasi – tasviriy san’at o‘qituvchisi Shoira opa Toshpo‘latovadan o‘tgan. Onasining tog‘ ortidan oltin koptokdek cho‘g‘lanib chiqayotgan quyosh, yam-yashil daraxtlarga qo‘nayotgan qushlar tasvirlangan rasmlari uni ilhomlantirib, qo‘liga mo‘yqalam ushlashiga sababchi bo‘ldi.
Ba’zan u televizorda dizaynerlar tomonidan ishlangan o‘zgacha, ko‘rkam liboslar namoyishini ko‘rganda beixtiyor shu kasb egalariga havas qilardi. Ularga taqlid qilib, jimjimador liboslar suratini chiza boshlagan. Shoira opa qizidagi layoqatni sezib, uni Sergeli tumanidagi 21-sonli musiqa va san’at maktabi o‘qituvchisi Oltinqiz opa Niyazxo‘jayevaga shogirdlikka berdi. Barchinoy ustozidan libos dizayni, qalam tasvir, rang tasvir sirlarini o‘rgandi.
Uning orzusi – kirish imtihonlaridan muvaffaqiyatli o‘tib, Kamoliddin Behzod nomidagi Milliy rassomlik va dizayn instituti talabasi bo‘lish. “Kelajakda o‘z atelyemni ochish niyatidaman. Milliylik va zamonaviylik hamohang bo‘lgan, o‘ziga xos uslubdagi liboslar yaratib, xalqaro ko‘rgazmalarda ishtirok etmoqchiman”, – deydi yosh dizayner.
Serqirra ijodkor Barchinoyning qalbida orzu va maqsadlari bir olam. Uning iqtidori qo‘llab-quvvatlansa, rag‘batlantirilsa, vaqti kelib o‘z samarasini berishiga ishonamiz.
Sofiya Nazarova
