Yozgi  ta’tilni  ba’zilar  bog‘ va tog‘larda  sayr   qilish, anhor-u  soylarda quloch otib cho‘milish, turli ko‘ngilochar o‘yinlarni tomosha qilish, mehmondorchilikka borish, oila-a’zolari bilan sayohatlarga chiqish deb tushunadi. Balki, bu ham to‘g‘ridir. Ammo, men ta’tilni fikrni  boyitishga,  o‘z  ustida  ishlashga berilgan  imkoniyat deb tushunaman.

Shu bois, undan unumli foydalanish maqsadida reja tuzib olganman. Unda boshqa tadbirlar qatori badiiy kitob o‘qish ham  o‘rin olgan. O‘quv yili davomida darsliklarda badiiy asarlardan parchalar o‘rganamiz. Hozir esa o‘zimga yoqqan ana shu asarlarni to‘liq o‘qiyapman. Yoshimga  mos badiiy kitoblarni tanlashimda  menga kutubxonachimiz yordam beradilar. Maktabimiz kutubxonasi badiiy adabiyotlarga boy. G‘.G‘ulom, Oybek, Rasul  Hamzatov, Qaysin Quliyev, Ibroyim Yusupov, Abdulla Oripov, Erkin Vohidov, Xudoyberdi To‘xtaboyev, Anvar Obidjonning asarlarini takror-takror o‘qiganman. Ta’tilga chiqishdan avval ustoz kutubxonasidagi Chingiz Aytmatov, Tohir Malik, Jek London, Mark Tven, Aleksey Tolstoy, Lev Tolstoy, Paustovskiylarning kitoblarini berdilar. Ta’til  bo‘yi  shu  kitoblarni o‘qidim. O‘zimga yoqqan qahramonlarning hayoti, umuman, kitobdan olgan taassurotlarimni  yon daftarimga qayd qilib boryapman. Bu menga kelgusida “Yosh kitobxon” tanlovida ishtirok etishimda qo‘l keladi.

Dilnura Narzullayeva,

Jizzax viloyati Zomin tumani 1-maktab 11-sinf