Bilamizki, siz yev­ro­palik Janni Rodari, An­tuan de-Sent Ekzyuperi, Hans Kristian Andersen asarlarini sevib o‘qiysiz. Biroq hech o‘ylab ko‘r­ganmisiz?  Xorijlik teng­dosh­laringiz qaysi  o‘z­bek adiblarining  asar­ini qi­ziqib mutolaa qiladi?

Xal­qaro  bolalarni  himoya qilish kuni arafasida  ana shu savolga  javob topildi.

BBC Culture nashrining xabar berishi­cha, dunyoning  56 ta mamlakatidan 177 nafar yozuvchi, illyustrator, jurnalist  va olimlar barcha davrlardagi eng yaxshi bolalar kitoblarini so‘rovnoma orqali saralab berdi. So‘rovda har bir respondent 10 ta eng sevimli kitob nomini ketma-ketlikda baholagan. Ekspertlar baholarni umumlashtirishda 10 bal­lik tizimdan foydalanib, eng yuqori ball to‘plagan adabiyotlar tartibi bo‘yicha top 100 talik nomini taqdim qildi. Unga ko‘ra, nashr tomonidan  taqdim qilingan ro‘y­xatning yuqori o‘rinlaridan Lyuis Kerrolning “Alisa mo‘jizalar mamlakatida”, Astrid Lindgrenning “Kichkintoy va tomda ya­shaydigan Karlson”, Antuan de-Sent Ekzyuperining “Kichkina Shah­zoda” asarlari o‘rin olgan. Quvonarlisi, ana shunday  zalvorli ro‘yxatda xalqimizning suyukli ijodkori, akademik shoir G‘a­fur G‘ulomning 1936-yilda chop etilgan “Shum bola” qissasi ham joy olgan. 

“Shum bola” asarini siz­ning bobolaringiz, otalaringiz, aka-opala­rin­gizgina emas, o‘zingiz ham juda yaxshi bilasiz. Qissa asosida yaratilgan filmni hozir ham yuzingizda kulgi bilan tomosha qilasiz.

O‘zbek bolalar adabiyotining eng sara asarlaridan hisoblangan qissada XX asr boshidagi Toshkent hayoti tasvirlangan. Undagi ichakuzdi syujetlar zamirida davrning jiddiy muammolari, og‘riqli nuqtalari tilga olingan. Yozuvchi o‘zi yashagan davrning qiyofasini, mahallalardagi hayot tarzini, ish va ishsizlik, qashshoqlar va boylar hayotini maroq bilan tasvirlaydi. Asar asr­dan asrga o‘z o‘quv­chi­­lari bilan birga o‘tib kelmoqda. Ang­la­gandirsiz, demak    siz “Alisa  mo‘jizalar  mam­­lakatida” kito­bi­ni  qanchalik  qizi­qib  o‘qisangiz, chet eldagi  bolalar  G‘a­fur G‘ulomning  “Shum bola” qissasini ana shun­day mehr bi­lan  o‘qishar  ekan. Bu o‘zbek bo­lalar adabiyotini dunyo tan olganini anglatadi.