Shu kunlarda 12 yoshga qadam qo‘ygan bolalarning  uylarida bobo-buvilari, ota-onalari bayramga qizg‘in tayyorgarlik ko‘rishyapti.

Navro‘z bayramigami, deysizmi? Shunaqa desa ham bo‘ladi-yu, aslida, ular   nabiralarining muchal to‘ylarini chiroyli o‘tkazish harakatida. Chunki yilboshi hisoblangan navro‘zda  yangi muchal boshlanadi. Iye, muchal nima deysizmi? Qoyil, rostdan bilmaysizmi, yoki mening bilimimni sinayapsizmi? Ha mayli, sinasangiz  sinay qoling. Aytib beraman. Qadim  zamonda Sharqda yil boshi Navro‘z 21-martda boshlangan. Ana shunda  odamlar  har bir yilga nom berishga kelishishgan. Bo‘lmasa yillardan adashib ketishlari mumkin edi-da. Keyin  o‘zlari tug‘ilgan paytni bilmay qolishdan ham qo‘rqishgan. Qanday nom qo‘yishni o‘ylashganda, yaxshisi yillarga hayvonlar nomini beramiz, degan qarorga kelishgan. Barcha hayvonlarni  o‘rmondagi  sayhonlikka chaqirishgan.

Yil tartibini hayvonlarning yig‘ilishga yetib kelishiga qarab belgilamoqchi bo‘lishgan. Birinchi bo‘lib sichqon kelgan. Va muchal  hisobining to‘riga chiqishga muyassar  bo‘lgan. Keyin sigir harsillab, gursillab buzog‘ini yetaklab kelib qolgan. Semizgina sigirni ortidan quvib, yo‘lbars kirib kelgan. Keyin... uyog‘ini sal keyin bilib olasiz. O‘tgan 2021-yil sigir yili ekanligi yodingizda. Chunki sizdan bir yosh katta aka-opalaringiz  bultur o‘n ikki yoshlarini – ya’ni bir  muchal to‘yini nishonlashgan edi. Ha barakalla, har bir muchal  12 yilda bir marta keladi. 12 yoshga to‘lganlar bolalik bilan xayrlashib, o‘smirlik ostonasiga qadam qo‘yishadi. Demak, bu yil  Sharq taqvimi bo‘yicha  21-martda Yo‘lbars yili boshlanadi. 2010-yilda tug‘ilgan bolalar aniqrog‘i, yo‘lbarsvoy va yo‘lbarsoylar ilk muchal to‘yini o‘tkazishadi. Ularga bobo-buvi, amaki, amma, tog‘a-xolalar bosh-oyoq sarpo – chiroyli liboslar sovg‘a qilishadi. Bu muchal egalari yo‘lbarslardek ehtirosli, jasur, tadbirkor, mag‘rur, biroz maqtanchoq bo‘lishadi. Keksalarning aytishicha, har bir yilning o‘z xususiyati bo‘lib, u boshqa muchal egasi hayotiga ta’sir ko‘rsatadi. Qani ko‘raylik-chi, Yo‘lbars muchali boshqa muchal egalariga qanday  sovg‘alar bilan keldi  ekan.

SICHQON – bu muchal egalari reja­lashtirgan (sportda chempion bo‘lish, maktabda a’loga o‘qish, tanlovda g‘olib  bo‘lish   kabi) ishlarini amalga oshiradilar.

SIGIR – Muchal taxtidan tushgan “sigirlar” yo‘g‘-ye buzoqchalar biroz  jahldor bo‘lib qolishadi. Ular bilan ehtiyot bo‘lib muomala qiling.

YO‘LBARS – bu yil hamma ishingiz besh bo‘ladi.

QUYON – sal  ehtiyotkorroq, sal hush­yorroq bo‘lmasa...

BALIQ – kutilmagan sovg‘alar oladi. Jamiyatda  obro‘si ko‘tariladi.

ILON – Biroz ter to‘kib ishlasagina  darslardan besh baho olishi, sport musobaqalarida  g‘olib bo‘lishi mumkin.

OT – o‘zgarishlar yili, yaxshi tomonga.

QO‘Y – Kishilarni xafa qilib qo‘ymaslik uchun ko‘proq mehnat qilishi, shirin muomalali bo‘lishi kerak.

MAYMUN – Bu yil ortiqcha  sho‘xlik qilmaganlari ma’qul.

TOVUQ – O‘rtoqlaringiz bilan inoq bo‘lsangiz, ishingiz yurishadi.

IT – do‘ppingizni osmonga oting. O‘zingizni kimligingizni  atrofdagilarga ko‘rsatib qo‘yadigan payt keldi.

TO‘NG‘IZ – Dangasalik qilmay harakat qilsangiz, barcha rejalaringiz ro‘yobga chiqadi.

Ana jasur, mard, halol  Yo‘lbarsning niyatini bilib oldingiz. Biz ana shunday  ezgu maqsadli muchal sohiblari – “Yo‘lbars”chalarni o‘smirlik sari chorlayotgan 12 yoshlari bilan tabriklaymiz.