Kitobga o‘ch o‘g‘ilcham,

Oltin topgan singari,

Chiqsa yangi bir asar

O‘qir mendan ilgari.

Mayli, bo‘lsin hikoya

Yoki to‘rt yo‘l quvnoq she’r.

Ayvonchada muk tushib,

Sharillatar Alisher.

Qosh qorayib ketguncha

Qo‘ldan tushmas kitobi.

Unga yoqqan she’rlarning

Hozircha yo‘q hisobi.

Olimdek serharakat,

Ishlar puxta berilib.

Uncha-buncha yoshlardek

Oshib ketmas kerilib.

Turna qator savolga

Soldat kabi doim shay.

Hozirjavob bo‘lmasdi,

Shuncha kitob o‘qimay.

Qudrat HIKMAT