Vatan – Onajon, derlar,

Vatan – jonajon, derlar.

Vatan – tug‘ilgan yer-u

Vatan – ulg‘aygan yerlar.

Vatan uchun ko‘ksingni

O‘q teshsa, bilinmaydi.

Vatan uchun tig‘ botsa,

Vujuding tilinmaydi.

Vatan – bizning otamiz,

Vatan – bizning onamiz.

Vatan uchun janglarda,

Olovlarda yonamiz.

Maktab, birinchi sinf,

Sen o‘tirgan ilk parta.

Sen yozgan birinchi harf,

O‘qigan so‘z – ilk marta.

Vatan – sinfdosh qiz u,

Ko‘ylaklari chiroyli.

Yurakka tushgan ilk cho‘g‘,

Chehrasi yulduz, oyli.

Vatan – bizning otamiz,

Vatan – bizning onamiz.

Ona uchun bahslarda,

Kurashlarda yonamiz.

Vatan – sen o‘sgan qishloq,

Qirga tutashgan cheti.

Sen ariqda oqqanda

Akang kelgandi yetib.

Sen yurgan yer-ko‘chalar,

Amma-yu, xolalaring.

Seni himoya qilgan

Qishlog‘ing bolalari.

Vatan – bizning otamiz,

Vatan – bizning onamiz.

Ota uchun dovlarda,

Sinovlarda yonamiz.

Vatan – mening yoshligim,

Hali hayot oldinda!

Aqlim qaynar, kuchliman,

Istiqbol bor oldimda.

Biz bunyodkor avlodmiz,

Kelajakni quramiz!

Orzu, maqsadimiz mo‘l,

Doim olg‘a yuramiz,

Davr-u davron suramiz!

Vatan – bizning otamiz,

Vatan – bizning onamiz.

Vatan uchun janglarda,

Olovlarda yonamiz.

               * * *

Oq kunlar imillab cho‘zilar,

Kapalak soyasin quvadi.

Dalada tug‘ilgan qo‘zilar

Hidini yomg‘irlar yuvadi.

Shalobbo bo‘ladi ust-boshim,

Atirdan gurkirar hamma joy.

Men bilan tortishib, talashib,

Uygacha kiradi saqich loy.

Bu yomg‘ir, bu loylar meniki,

Meniki atirli qiyoqlar.

Yastangan bu joylar meniki,

Meniki ko‘kargan bayroqlar!..

Salim ASHUR