Jannat yurtimizning jannat gullari,

“Bilimlar kuni”ngiz muborak bo‘lsin.

Bugun ko‘zlaringiz quvonch-la yonar,

Oq oydin tilaklar to‘lishsin, to‘lsin.

Sizni mudom qo‘llasin bobolar ruhi,

Qadamlar qolipdek tushsin iziga.

Siz shunday o‘qing-ki, dunyo tan bersin,

O‘zbekning jur’atli o‘g‘il-qiziga.

Jadid bobolarning orzu-o‘ylari

Siz misol barisi amalga oshsin.

Yangi O‘zbekiston, yangi Renessans

Bilimli yoshlarga eshigin ochdi.

Eng qudratli kuch bu –  ilm chashmasi,

Onajon yurtimning tubsiz ummoni.

Internet asrining bilimdonlari,

Bir zamon keldiki, o‘qish zamoni.

Tiniq tafakkur-la tashlangiz qadam,

Kelajak sizniki, ovoz sizniki,

Zakovat kalitin qo‘lga olsangiz,

Yer-u ko‘k sizniki, parvoz sizniki.

Zahro HASANOVA