Bobur bobom, sarkarda bobom,

Ham olim-u, ham shoir bobom.

Tomirida Amir Temurning

Qoni oqqan jahongir bobom.

“Boburnoma” ilm ummoni,

Sho‘ng‘ib ko‘rgan biladi uni.

Bu qomusiy kitobning sehrin

O‘rganamiz yillar, har kuni.

Sport, san’at, geografiya, tarix,

Davlatchilik – bari bunda jam.

Tabiatning rangin olami,

Tog‘-u toshlar siri mujassam.

Tuyuq, g‘azal, ruboiylarin

O‘qisak xo‘p qilamiz huzur.

Ko‘ngillarga singib ketadi

Go‘yo shoir yoningda zuhur.

Zahiriddin Bobur Mirzoning

Umri o‘tdi jang-u jadalda.

Hech halovat bilmadi va lek,

Huzur topdi ijod mahalda.

Balxdan tortib Bangolga qadar

Yurt so‘ragan odil shohdir u.

Sog‘inchlari she’rga aylangan,

Arslon kelbat yuksak tog‘dir u.

Zahro HASANOVA