Assalomu alaykum! “Gulxan” jurnali saytiga xush kelibsiz!

Saytimizda bir-biridan qiziqarli maqolalar, hikoyalar, ertaklar va she’rlarni o‘qishingiz mumkin. Turli fanlarga oid ma’lumotlar bilimlaringizni yanada boyitishga yordam beradi!

“Bogʻchamdan hech qolmayman”

Bobomlar

Dovyurak, qoʻrqmas, botir,

Har ishda jasur, qodir,

Sadoqatli, bahodir –

Amir Temur bobomlar.

 

Soʻzlari ulugʻ hikmat,

Sarkorlari bermas pand.

Shahri maskan – Samarqand,

Amir Temur bobomlar.

 

Dovrugʻi tutgan olam,

Ruhlari bitgan nolam,

Baxtimni kutgan har dam,

Amir Temur bobomlar.

 

Bogʻchamdan hech qolmayman

Bu yil toʻrtga kiraman,

Kattalarday yuraman.

Boʻyim yetar tokchaga,

Qatnayman men bogʻchaga.

 

Bogʻcha opam Nozigul,

Soʻzi yaxshi, shirin til.

Ertak aytib beradi,

Meni yaxshi koʻradi.

 

Bor mening qoʻgʻirchogʻim,

Shodining bor toychogʻi.

Sasha fil minib oʻynar,

Saida qoʻshiq kuylar.

 

Shashka surar Javohir,

Xumoyun, Dilyor – mohir.

Doirani chalaman,

Uxlab dam ham olaman.

 

Bogʻchamdir gulzor, boʻston,

Musaffo baland osmon.

Zerikmayman, tolmayman,

Bogʻchamdan hech qolmayman.

 

Ona tilim

Navoiy, Qoshgʻariy soʻzisan,

“Qutadgʻu bilig”ning koʻzisan,

Yassaviy, Qodiriy oʻzisan,

Onajon, onajon, tilginam.

 

Jahongir Temurning qadami,

Ulugʻbek Koʻragon olami.

Muhammad, Boburning qalami,

Onajon, onajon, tilginam.

 

Fitratning, Usmonning yulduzi,

Choʻlponning “Kecha va kunduz”i,

Abdulla, Oybekning chin soʻzi,

Onajon, onajon, tilginam.

 

Umrim bor, qonim bor, yashaysan,

Orim bor, shonim bor, yashaysan,

Nurim bor, shaʼnim bor, yashaysan,

Onajon, onajon, tilginam.

 

Dilimning ziyosi, shuurim,

Elimning dunyosi, gʻururim,

Baxtginam quyoshi – sururim,

Onajon, onajon, tilginam.

 

Bahodir Oʻrinov

2016–2023 © “Gulxan” jurnali tahririyati. Barcha huquqlar himoyalangan. Saytdan ma’lumot olinganda manba ko‘rsatilishi shart.