Shavkatingni shohsupaga olib chiqqan,

Pahlavonlar saflarini yorib chiqqan,

“Zoʻrlar ichra zoʻr boʻlay!”, deb gʻolib chiqqan,

Oʻgʻlonlaring madh etmasam boʻlmas, Vatan!...

...Rustam, Rishod, Diyorbeklar diyorisan!

Elmurodning koʻksidagi tumorisan!

Muhammad-u, Murodjonning iqbolisan!

Ixtiyordek ishonchlari soʻnmas, Vatan!

Barchinlar ham yigitlardan oʻtar hali,

Oltin, kumush medallarni yutar hali,

Oksananing matonati – bu yurt shaʼni!

Suving ichgan qizlar qirqda oʻlmas, Vatan!

Boshimizni baland qildi bu kun mardlar,

Yuraklardan chiqdi asriy alam, dardlar,

Shodliklarga ulanganda shukr-u, hamdlar.

Bayramlaring toʻyonasiz boʻlmas, Vatan!

Bayrogʻimiz belanchakka yopib qoʻyay,

Beshigimga nishonimiz taqib qoʻyay,

Qulogʻingga bir niyatim aytib qoʻyay,

“Endi qalbda orzularim soʻnmas, Vatan,

Chempionsiz xonadonlar boʻlmas, Vatan!”

Muazzam IBROHIMOVA