Assalomu alaykum! “Gulxan” jurnali saytiga xush kelibsiz!

Saytimizda bir-biridan qiziqarli maqolalar, hikoyalar, ertaklar va she’rlarni o‘qishingiz mumkin. Turli fanlarga oid ma’lumotlar bilimlaringizni yanada boyitishga yordam beradi!

Dono bolajon

Osmonga chiqdi quyosh,

Shu vaqt yogʻdi yomgʻir ham.

Bir zumda yuzim, sochim,

Koʻylakcham ham jiqqa nam.

Samoda paydo boʻldi

Kamalak turfa xil rang,

Goʻyo koʻkka in qurgan

Kapalaklar bir qarang.

Endi sizga bir savol:

Necha xil rang osmonda?!

Yoʻl chizgan qavat-qavat,

Shu ranglar qaysi nomda?!

 

***

Sayr qildik dalani,

Koʻrdik gala qargʻani,

Don teradi taq, tuq, tuq,

Shundan uning qorni toʻq.

Yer kavlaydi yumronlar,

Qochib qolar quyonlar.

Ayni bahor pallada,

Mazza qildik dalada.

Savol sizga doʻstlarim:

Qargʻa qanday sayraydi?!

Quyonlar va yumronlar

Nega yerni kavlaydi?!

 

***

Bogʻimizda shaftoli,

Pishdi oʻrik, olmalar.

Olcha bilan gilosning

Yuzi yoqutdek yonar.

Anor ketdi yorilib,

Dur-u sharbatga toʻlib.

Ularni savatlarga

Joyladik xursand boʻlib.

Bir savat qizil meva,

Bir savatda qolgani,

Qizil mevalar nomin

Bolajonim, top qani?!

 

***

Onam yopdi kulcha non,

Menga berdi beshtasin.

Singlim Raʼnoga bitta,

Opam Layloga uchta.

Koʻp bolalar kelishdi,

Bizni oʻrab olishdi.

Boʻlishing deb kulchani,

Toʻldirishdi koʻchani.

Onam yopdi shirmoy non,

Ichida shirin kulcha,

Ulashdik bolalarga,

Kulchalar soni qancha?!

 

***

Bugun kirdim yettiga,

Endi maktab boraman.

Oʻyinchoqlar oʻrniga

Kitobga doʻst boʻlaman.

Ukamga mashinani,

Singlimga ayiqchani,

Fotima va Zuhraga

Vertolyot, qayiqchani.

Sovgʻa qildim barchasin,

Sanogʻini toping siz,

Bizning oilamizda

Nechta oʻgʻil, nechta qiz?!

 

***

Mitti quyon oʻrmonda

Qulupnay termoq boʻldi.

Oʻrtogʻi tipratikan,

Unga yordamga keldi.

Toʻldirib savatchani

Yerga toʻkdilar borin.

Qulupnay bilan birga

Toʻkildi qoʻziqorin.

Boshin qashib quyonvoy,

Doʻstiga qarab qoldi.

Menga ayt-chi oʻrtoqjon,

Kim qoʻziqorin terdi?!

 

Nargiza SAIDOVA,

Qashqadaryo viloyati Koson tumanidagi 5-maktab oʻqituvchisi

2016–2020 © “Gulxan” jurnali tahririyati. Barcha huquqlar himoyalangan. Saytdan ma’lumot olinganda manba ko‘rsatilishi shart.