Navroʻz qoʻshigʻi

Boychechaklar bosh koʻtarib

Qish qahrini sindirdilar.

Buvijonlar yeng shimarib

Bugʻdoy koʻki undirdilar.

Sumalaklar qaynar, ana,

Bu ham elga rizq-u roʻz.

Har goʻshada toʻy-tantana

Bu – bizning Navroʻz, Navroʻz.

Uzoq yoʻldan togʻlar oshib

Qaldirgʻochlar qaytdilar.

Musichalar ku-kulashib

Xush koʻrdik, deb aytdilar.

Urugʻ kutib koʻpchir tuproq,

Yashillanar dala-tuz.

Keksa-yu yosh... Hamma quvnoq,

Bu – bizning Navroʻz, Navroʻz.

Argʻimchoqda uchgan qizlar

Shamollarga yoqadi.

Yalpizlarni suyib, sizlab

Anhor toʻlib oqadi.

Hatto Boboquyosh oshiq,

Uzolmaydi Yerdan koʻz.

Jaranglaydi yalla, qoʻshiq

Bu – bizning Navroʻz, Navroʻz

Lang ochilib darvozalar,

Yozilar oq dasturxon.

Toʻrt yon ketar ovozalar,

Tashrif buyurar mehmon.

Ozod yurtda koʻngil oʻsdi,

Taʼrifiga toping soʻz.

Oʻzbegimning asl doʻsti

Bu – bizning Navroʻz, Navroʻz.

Kitobga doʻst boʻlarman

Muqaddasdir tuprogʻim,

Muhabbati koʻprogʻim.

Yashnasin hurlik ichra

Mening oʻzbakiy bogʻim.

Oftobga doʻst boʻlarman,

Odobga doʻst boʻlarman.

Bobolarimga oʻxshab

Kitobga doʻst boʻlarman...

Odobga doʻst boʻlarman,

Oftobga doʻst boʻlarman.

Bobolarim singari

Kitobga doʻst boʻlarman.

Oshi halol elim bor,

Oftobjamol feʼlim bor.

Bulbullar makon etgan

Yuragim huddi bahor.

Vatan chorlasa shayman,

Tinchligin asragayman.

Mard boʻlib maydon tushgan

Alpomishga oʻxshayman.

Odobga doʻst boʻlarman,

Oftobga doʻst boʻlarman.

Bobolarim singari

Kitobga doʻst boʻlarman.

Zamira Roʻziyeva